Samarqanddagi mahallalarning birida qurilgan ko‘p qavatli bino tasvirlari ijtimoiy tarmoqlarda tarqalib, muhokamalarga sabab bo‘lgandi. Qurilish va uy-joy kommunal xo‘jaligi vazirligi mazkur binoning 1-qavatida noqonuniy qahvaxona tashkil qilingani haqidagi xabarlarga munosabat bildirdi.
O‘rganishlar davomida chindan ham binoning 1-qavatida noqonuniy ravishda qahvaxona faoliyat yuritayotgani aniqlangan. Mazkur bino 2022-yilda o‘tkazilgan tekshiruvda bino o‘zboshimchalik bilan hech qanday hujjatlarsiz qurilgani, xavfsizlik talabalariga javob bermasligi ma’lum bo‘lgandi.
2022-yilning 6-iyul kuni fuqarolik ishlari bo‘yicha Toyloq tumanlararo sudi tomonidan binoni qurdirgan fuqaroga nisbatan uni o‘z hisobidan buzishi to‘g‘risida hal qiluv qarori berilgan.
Vazirlikning bergan bayonotiga ko‘ra, bugungi kunda mazkur sud qarorining ijrosi MIBning Samarqand tumani bo‘limi ish yurituvida. Shuningdek, Samarqand tuman qurilish bo‘limi tomonidan 15-may kuni 414-sonli xat bilan MIB Samarqand tuman bo‘limiga sud qarorining ijrosini taʼminlash bo‘yicha xat yo‘llangan.
Ushbu bino Samarqand viloyati Samarqand tumani “Joyi soy” mahallasida joylashgan bo‘lib, fuqaro F.X. o‘z uyining bir qismini buzib, joyidan 21,4x12,6 metr o‘lchamdagi 11 qavatli, 2 qavat yerto‘lali mehmonxona qurgan. Bino belgilangan tartibda shaharsozlik kengashidan o‘tmagan. Qurilishga ruxsat beruvchi Samarqand tumani hokimining qarori yoki tuman qurilish bo‘limining ruxsatnomasi, arxitektura rejalashtirish topshirig‘i mavjud emas.
Bundan tashqari, mehmonxona majmuasi obyekti bosh rejasini naturaga ko‘chirish dalolatnomasi rasmiylashtirilmagan. Muhandislik geologiyasi, loyiha-smeta hujjatlari to‘liq ishlab chiqilmagan hamda tasdiqlanmagan. Qurilish obyektida foydalanilgan qurilish materiallarining talablarga muvofiqligi to‘g‘risidagi pasport va sertifikatlari taqdim etilmagan.
Fevral o‘rtalarida Toshkent shahri Yangihayot tumanida fuqarolar 10 qavatli uy tomiga uy qurib olgani aniqlangandi. Mazkur uyga xizmat ko‘rsatuvchi boshqaruv tashkilotlarining bir necha bor ogohlantirishlari ham mulkdorlarni ushbu fikrdan qaytarmagan.
Izoh (0)