Disney va Pixar Tom Xenks, Tim Allen va Joan Kyusakning “O‘yinchoqlar tarixi 5” filmidagi qahramonlarni ovozlashtirishga qaytganini tasdiqladi. Ular, shuningdek, yangi qahramonlarning paydo bo‘lishini eʼlon qilishdi, biroq aniq maʼlumotlar berilmadi.
Keyingi qismda sakkiz yoshli Bonni uning dunyosini butunlay o‘zgartiradigan planshet oladi. Eski o‘yinchoqlar uchun bu qurilma haqiqiy yovuzga aylanadi, chunki u tufayli qizaloq ularga eʼtibor bermay qo‘yadi. Biroq ular taslim bo‘lishni xohlamaydi va qizning qalbiga qayta yo‘l topish rejasini ishlab chiqadi.
Filmning davomi 2026-yil 19-iyunda ekranlarga chiqishi kutilmoqda. Eslatib o‘tamiz, mashhur franshiza 18 ta “Oskar” nominatsiyasiga sazovor bo‘lgan va 3 ta haykalchani qo‘lga kiritgan.
Disney, shuningdek, yangi original loyiha — “Gatto” multfilmini eʼlon qildi. Voqealar Venetsiyada kechadi, u yerda yillar davomida dengiz qirg‘og‘i bo‘ylab kezib yurgan qora mushuk o‘z hayotining maʼnosi haqida o‘ylay boshlaydi. Mushuklar mafiyasi boshlig‘i bilan bog‘liq muammolar uni ko‘cha rassomi bilan do‘stlashishga va erksevarligiga qaramay, uy hayvoniga aylanishga majbur qiladi.
Rejissyor “Luka” filmining muallifi Enriko Kasarosa bo‘ladi. Uslubi bo‘yicha multfilm qo‘lda chizilgan animatsiyaga yaqin turadi. Premyera 2027-yil iyun oyiga belgilangan.
Izoh (0)