Sharofiddin Lolayev 23-may kuni Termiz shahri hokimi etib tayinlandi. Bu haqda Surxondaryo viloyati hokimligi matbuot xizmati xabar berdi.
Xalq deputatlari Termiz shahar Kengashining navbatdan tashqari sessiyasida 2022-yil sentyabridan buyon Termizga hokimlik qilib kelgan O‘ktam To‘rayev boshqa ishga o‘tgani munosabati bilan lavozimidan ozod qilindi. Viloyat rahbari taklif etgan nomzod — Sharofiddin Lolayev deputatlar tomonidan Termiz shahri hokimi etib tasdiqladi.
Sharofiddin Lolayev 1987-yilda Qumqo‘rg‘on tumanida tug‘ilgan. 2015-yilda Termiz davlat universitetini bakalavr, 2021-yilda magistr darajasini tamomlagan. Mehnat faoliyati davomida Surxondaryo viloyati qurilish sohasida hududiy nazorat inspeksiyasi bo‘lim boshlig‘i, bosh inspektori, birinchi o‘rinbosari, shuningdek, Denov tumani va Termiz shahar hokimining o‘rinbosari kabi mas’uliyatli lavozimlarda ishlagan. Tayinlovga qadar Surxondaryo viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi boshlig‘i vazifasida faoliyat yuritgan.
Shu kuni Xalq deputatlari Muzrabot tumani Kengashining navbatdan tashqari sessiyasi bo‘lib o‘tdi. Sessiyada 2024-yil sentaybridan buyon Muzrabot tumani hokimi vazifasini bajarib kelgan Alisher Qurbonov lavozimidan ozod etilgani ma’lum qilindi. Viloyat hokimi Ulug‘bek Qosimov ushbu lavozimga Abdulla Mamatqulov nomzodini taklif etdi. Taklif tuman Kengashi deputatlari tomonidan ma’qullandi.
Abdulla Mamatqulov 1985-yilda Oltinsoy tumanida tug‘ilgan. 2011-yilda Toshkent to‘qimachilik va yengil sanoat institutini mexanik-texnolog mutaxassisligi bo‘yicha tamomlagan. Mehnat faoliyati davomida “Surxondaryo suv ta’minoti” MChJ direktorining o‘rinbosari, Bandixon tumani hokimining o‘rinbosari, “Surxondaryosuvqurilishinvest” DUK direktori kabi mas’uliyatli lavozimlarda ishlagan. Tayinlovga qadar “Surxondaryo suv ta’minoti” AJ direktori vazifasida faoliyat yuritgan.
Izoh (0)