Farg‘ona viloyati Oltiariq tumanida erkak xotini aliment to‘lamagani uchun ustidan arz qildi. Bu haqda MIB axborot xizmati “Daryo”ga xabar berdi.
Keltirilishicha, Oltiariq tumanida yashovchi fuqaro M.M. (erkak) tomonidan sobiq turmush o‘rtog‘i X.H. (ayol)ga nisbatan aliment undirish yuzasidan sudga murojaat etilgan.
Sudning 11-aprel kungi ijro hujjatiga asosan, onadan ikki nafar voyaga yetmagan farzandining moddiy ta’minoti uchun daromadining uchdan bir qismi miqdorida aliment undirish belgilangan. Biroq ayol mazkur majburiyatdan qasddan bo‘yin tovlagan va yashirinib yurishga uringan.
Mazkur holat yuzasidan Majburiy ijro byurosi tomonidan qidiruv tadbirlari o‘tkazilib, X.H. boshqa viloyatda aniqlangan va ushlangan. Unga nisbatan Ma’muriy javobgarlik to‘g‘risidagi kodeksining 47-moddasi — “Voyaga yetmagan bolalarni moddiy ta’minlashdan bo‘yin tovlash” bilan ish qo‘zg‘atilib, materiallar sudga taqdim etilgan.
Sud majlisida ayol 22 363 310 so‘m miqdoridagi aliment qarzdorligini tan olgan bo‘lsa-da, uni to‘lashdan bosh tortgan. Ushbu holatni inobatga olgan holda, Jinoyat ishlari bo‘yicha Qo‘shtepa tuman sudi tomonidan unga nisbatan 7 sutka ma’muriy qamoq jazosi tayinlangan.
Alimentdan qochgan otalar haqida
Namangan viloyati Chortoq tumanida aliment to‘lashdan qochib yurgan erkak uy yerto‘lasidan topilgandi. Qarzdor ota tomonidan qarzdorlik 20 million so‘mdan ortgan. Ishlash maqsadida Toshkent shahriga ketgach, unga nisbatan qidiruv eʼlon qilingan. Xodimlar tomonidan Toshkentdagi xonadon yashash joylari puxta ko‘zdan kechirilganda, yerto‘laga yashirinib olgani aniqlangan. Unga nisbatan 15 sutkalik maʼmuriy qamoq jazosi tayinlangan.
Qashqadaryo viloyati Yakkabog‘ tumanida aliment to‘lamay qochib yurgan erkak Toshkentdagi molxonadan topilgan. Voyaga yetmagan farzandlari uchun to‘lanmagan aliment miqdori 3 million 200 ming so‘m ekani aytilgan.
Shuningdek, Namangan viloyati Chust tumanida aliment to‘lashdan qochib yurgan erkak Ohangarondan topilgan. O‘tkazilgan suhbat mobaynida qarzdorlik salkam 15 million so‘mga yetgani, uni bartaraf etish lozimligi tushuntirilgan. Qayd etilishicha, u yana mas’uliyatni his etmagan va unga nisbatan jinoyat ishi yuritilgan.
Andijon viloyati Shahrixon tumanida esa aliment to‘lashdan qochib, uyining yerto‘lasida yashirinib yurgan erkak ushlanib, 15 sutkaga qamalgan.
Eng antiqa holatlardan biri, Namangan viloyatida aliment to‘lamay yurgan erkak boshqa xotinining uyida yashiringani aniqlangan. Unda qarzdorlik to‘planib, 24,3 million so‘mga borib yetgan edi.
Shu kabi, Qashqadaryoda MIB xodimi 2 yildan beri qidiruvda bo‘lgan qarzdor erkakni berkinayotgan joyida topib olgan. Tadbir jarayonida xodimlardan biri uyning boloxonasi va tomini tekshirayotgan paytda, ikkinchi xodim yiqitilgan ko‘rpalar tagidan fuqaroni olib chiqdi.
Shu kunning o‘zida qarzdor mavjud 28 million 971 ming so‘m aliment qarzdorligini to‘lamagani sababli Jinoyat ishlari bo‘yicha Yakkabog‘ tuman sudi tomonidan B.Buxarovga nisbatan 15 sutka ma’muriy qamoq jazosi tayinlangan.
Surxondaryo viloyati Angor tumanida aliment to‘lamay, 2 yildan buyon qidiruvda bo‘lgan erkak uy yerto‘lasidan topilgan.
Toshkentda uchta xotiniga aliment to‘lamagan erkakning qarzini 4-xotini to‘lagani haqidagi holat ham kuzatilgan. Shundan so‘ng sud tomonidan qarzdorga nisbatan to‘plangan hujjatlar qayta ko‘rilib, yetkazilgan zarar miqdori qoplangani sababli 15 sutkalik qamoq jazosini to‘liq o‘tamasdan ozod qilingan.
Izoh (0)