Shahrixon tumanida aliment to‘lashdan qochib, uyining yerto‘lasida yashirinib yurgan erkak ushlanib, 15 sutkaga qamaldi. Bu haqda “Daryo” muxbiri Umidjon Mamarasulov xabar bermoqda.
Byuroning Andijon viloyati boshqarmasi axborot xizmatining maʼlum qilishicha, Byuroning Shahrixon tuman bo‘limi ish yurituviga Fuqarolik ishlari bo‘yicha Bo‘z tumanlararo sudining 2019-yil 25-dekabrdagi sud buyrug‘iga asosan qarzdor M.S.dan undiruvchi M.M. foydasiga ikki nafar farzandi uchun aliment undirish haqidagi ijro hujjati kelib tushgan.
Ijro hujjatining ijrosini taʼminlash maqsadida davlat ijrochisi tomonidan qarzdor M.S. aliment qarzini to‘lashi lozimligi haqida bir necha marotaba ogohlantirilganligiga qaramasdan aliment to‘lashdan qochib yashirinib yurgan. Natijada qarzdorlik 37 million 756 ming so‘mga borib yetgan. Qarzdorga nisbatan 2021-yilning 18-may kuni qidiruv eʼlon qilingan.
Kuni kecha byuroning tuman bo‘limi xodimlari tomonidan qarzdorga tegishli mol-mulklarni ko‘zdan kechirish maqsadida uning yashash xonadoniga borilganda qarzdorning otasi o‘g‘li uyining yerto‘lasida yashirinib yurganligini maʼlum qilgan. Ko‘rsatmaga asosan xonadon yerto‘lasi tekshirilganida haqiqatan qarzdor M.S. yashirinib o‘tirganligi aniqlanib, ushlangan va ish hujjatlari sudga taqdim qilingan.
Ushbu ishni ko‘rib chiqqan Jinoyat ishlari bo‘yicha Shahrixon tuman sudi qarzdor M.S.ni Maʼmuriy Javobgarlik to‘g‘risidagi Kodeksning 47-4-moddasiga asosan aybli deb topib, unga nisbatan 15 sutka maʼmuriy qamoq jazosi tayinlagan.
Avvalroq Andijonda qarzdor onadan 2 nafar farzandi uchun 32 mln so‘m aliment puli undirilgani xabar qilingandi.
Izoh (0)