Toshkent viloyatida o‘z onasiga ta’minot puli to‘lashni istamagan farzandlarga qonuniy chora ko‘rildi. Bu haqda Majburiy ijro byurosi matbuot xizmati xabar berdi.
Qayd etilishicha, byuroning Quyi Chirchiq tumani bo‘limiga fuqarolik ishlari bo‘yicha tumanlararo sudning 2023-yil 23-oktyabrdagi sud buyrug‘i kelib tushgan. Qarzdorlar D.U. va B.U. onasi D.U. foydasiga voyaga yetgan shaxsning mehnatga layoqatsiz va moddiy yordamga muhtoj bo‘lgan ota-ona uchun aliment pullarini to‘lashdan bosh tortib kelgan.
Sud qarori bilan farzandlarga nisbatan Ma’muriy javobgarlik to‘g‘risidagi kodeksning 47-5-moddasiga (ota-onani moddiy ta’minlashdan bo‘yin tovlash) asosan 15 sutka qamoq jazosi tayinlandi.
Avvalroq Toshkentda uchta xotiniga aliment to‘lamagan erkakning qarzini 4-xotini to‘lagani, Namanganda aliment to‘lamay, yashirinib yurgan erkak tungi klubdan topilgani to‘g‘risida xabar berilgandi.
Izoh (0)