Farg‘onada fuqaro bankdan qarzini yuk mashinasi savdoga qo‘yilgach, to‘ladi

Qidiruvdagi Mercedes-Benz Actros yuk mashinasi Marg‘ilondan topildi. Bu haqda Majburiy ijro byurosi “Daryo”ga ma’lum qildi.

Qayd etilishicha, MIBning Toshloq tumani bo‘limi tomonidan qarzdor, yakka tartibdagi tadbirkor S.Q.dan undiruvchi “Hamkorbank” ATB foydasiga 155 million so‘m kredit qarzni undirish haqidagi ijro hujjati bo‘yicha qarzdor ogohlantirilgan. Shunday bo‘lsa-da, u bank oldidagi qarzini to‘lamay kelgan.

Davlat ijrochisi tomonidan 8-avgust kuni garov mulki bo‘lgan Mercedes-Benz Actros avtotransport vositasiga nisbatan qidiruv e’lon qilingan.

Boshqarmaning qidiruv sho‘basi tomonidan olib borilgan tezkor-qidiruv harakatlar davomida 16-avgust kuni yuk avtomobili Marg‘ilon shahridan topilib, xatlangan.

Xatlangan avtomashinani savdoga qo‘yish jarayonida qarzdor bankdan bo‘lgan 155 million kredit qarzini to‘liq to‘lagan va ijro ishi amalda tamomlanib, transport vositasi egasiga qaytarilgan.