Qashqadaryo viloyatining Kitob tumanida alimentdan qarzdor farzandlar otasi uchun 15 ming dollar aliment pullarini to‘lab bergach, bu haqdagi ijro hujjati tugatildi.
MIBning Qashqadaryo viloyati boshqarmasi axborot xizmati mas’uli Gulnoza Dilmurodovaning “Daryo”ga bildirishicha, Fuqarolik ishlari bo‘yicha Shahrisabz tumanlararo sudi qaroriga asosan fuqaro Z.Z. foydasiga uch nafar farzandlaridan aliment undirish belgilangan.
Fuqarolik ishlari bo‘yicha Shahrisabz tumanlararo sudining 2023-yil 13-apreldagi ijro varaqasiga asosan fuqaro Z.Z. foydasiga uch nafar farzandidan aliment undirish belgilangandi. Mazkur hujjat ijrosini ta’minlash davomida MIB xodimlari aliment to‘lash majburiyatini olgan farzandlarga bu haqda tushuntirish ishlarini olib bordi. Joriy yilning 10-yanvar kuni taraflar o‘zaro kelishgach, farzandlar otasi uchun 15 ming dollar miqdoridagi pul mablag‘ini to‘lab berdi. Shu munosabat bilan ijro hujjati ijrosi tamomlandi, — deydi Gulnoza Dilmurodova.
Mas’ulning qo‘shimcha qilishicha, MIB harakati bilan o‘z ota-onalariga aliment to‘lashdan bo‘yin tovlab kelgan farzandlar qamalmaslik uchun aliment to‘lovlarini to‘lab bermoqda.
Jumladan, alimentdan bo‘yin tovlab kelgan farzandlar M.M. foydasiga 11 oy uchun 3 million 465 ming, SH.B. foydasiga 8 oy uchun 1 million 840 ming so‘m pullarni to‘lab berishdi, — deydi u.
Gulnoza Dilmurodovaning qo‘shimcha qilishicha, Qashqadaryoda bugungi kunda 124 nafar ota-ona o‘z farzandlaridan aliment undirib keladi.
Izoh (0)