O‘tgan yilda chet elda ota-ona qaramog‘isiz qolib ketgan 43 nafar bola O‘zbekistonga qaytarib olib kelindi. Bu haqda Oliy Majlisning Inson huquqlari bo‘yicha vakili axborot xizmati rahbari Fotima Madrahimova ma’lum qildi.
Uning bildirishicha, Bola huquqlari bo‘yicha vakil tomonidan chet elda ota-ona qaramog‘isiz qolib ketgan bolalarni O‘zbekistonda qaytarishda Ichki ishlar vazirligi bilan keng hamkorlik qilinmoqda. 2022-yil davomida Rossiyadan jami 37 nafar, Qozog‘istondan 4 nafar, Turkiyadan 2 nafar voyaga yetmaganlar — jami 43 nafar bola O‘zbekistonga qaytarib olib kelindi.
O‘zbekistonning bolalar va ayollarni nizoli hududlardan olib kelish va ularni jamiyatga moslashtirish bo‘yicha tajribasi xalqaro miqyosda e’tirof etilmoqda. Ushbu tajribani o‘rganish maqsadida O‘zbekistonga Qirg‘iziston, Turkmaniston, Maldiv Respublikalarining delegatsiyalari tashrif buyurdi.
Yil davomida Rossiya va Qozog‘iston Bola huquqlari bo‘yicha vakillari tomonidan 15 ta murojaat qabul qilinib, barchasi ijobiy hal etilgan.
2022-yil mobaynida Bola huquqlari bo‘yicha vakil nomiga bola huquqlari va qonuniy manfaatlari buzilishi to‘g‘risida jismoniy va yuridik shaxslar, bolalar hamda ular qonuniy vakillari tomonidan jami 696 ta murojaat qabul qilingan. Shulardan 64 ta murojaat qanoatlantirilgan, 310 ta murojaat yuzasidan huquqiy tushuntirish berilgan.
Aliment olish huquqiga doir 29 ta murojaatni o‘rganish davomida 2022-yil davomida Bosh prokuratura tomonidan 71 nafar tarbiyalanuvchiga ota-onalaridan 389,3 million so‘m aliment undirib berilishi ta’minlangan.
2021—2022-yillarda jami ota-ona qaramog‘idan mahrum bo‘lgan bolalarga mo‘ljallangan 21 ta bolalar muassasasi faoliyati tugatilgan.
Qayd etilishicha, ayni paytda Respublika bo‘yicha jami 139 ta oilaviy bolalar uyi tashkil etilgan bo‘lib, ularda 822 nafar bolalar tarbiyalanmoqda.
Eslatib o‘tamiz, endilikda O‘zbekistonda “Bola huquqlarining kafolatlari to‘g‘risida”gi qonunga kiritilayotgan o‘zgarishga ko‘ra bolaning otasi, onasi yoki ularning o‘rnini bosuvchi shaxs chet davlatda bolani nazoratsiz qoldirish, ya’ni ota-onaning, ular o‘rnini bosuvchi shaxsning bolaga ta’minot, tarbiya va ta’lim berish bo‘yicha o‘z majburiyatlarini bajarishdan bo‘yin tovlashi qonunchilikka muvofiq javobgarlikka sabab bo‘ladi.
Izoh (0)