Farg‘onada alimentdan qochib yurgan erkak Toshkentdagi uy qudug‘idan topildi, deb xabar bermoqda MIB axborot xizmati “Daryo”ga.
Maʼlum qilinishicha, Majburiy ijro byurosi Farg‘ona viloyat boshqarmasi qidiruv sho‘basi inspektorlari tomonidan olib borilgan navbatdagi tadbir davomida farzandining moddiy taʼminotidan bo‘yin tovlab yurgan qarzdor yashash xonadonidagi quduqdan topildi.
Oltiariq tumanida yashovchi fuqaro turmush o‘rtog‘i bilan oilaviy kelishmovchiliklar sabab ajrashib ketgan va ikkinchi tomon farzandini moddiy taʼminlamay qo‘ygan. Shundan so‘ng, ona o‘z huquqidan foydalangan holda farzandi haqini talab qilib sudga murojaat etadi. Sud qaroriga ko‘ra, undiruvchi ayol foydasiga ikki nafar farzandlari uchun har oyda aliment undirish tartibi belgilanadi.
Sud ijro hujjati Byuroning Oltiariq tuman bo‘limi ish yurituviga kelib tushgan va ijro harakatlariga kirishilgan. Qarzdorlik 10 million so‘mdan ortib ketdi. Ishlash maqsadida Toshkent shahriga borib, berkinib yurgan.
Unga nisbatan davlat ijrochisi tomonidan qidiruv eʼlon qilindi. Boshqarma inspektorlari huquqni muhofaza qilish idoralari xodimlari bilan hamkorlikda topish chorasini olib bordi.
Bu natija berib, Toshkent shahridan yashash xonadoniga kelgani maʼlum bo‘ldi. Xodimlar olingan tezkor maʼlumotlarga ko‘ra yashash xonadonga borganda, oila aʼzolari uning kelmaganini bildirgan. Biroq xonadon yashash joylari puxta ko‘zdan kechirilganda, qarzdor yangi kovlanayotgan quduq ichidan topilgan.
Qidiruvdagi shaxs belgilangan tartib bo‘yicha davlat ijrochisiga topshirildi.
Alimentdan qochgan otalar haqida
Namangan viloyati Chortoq tumanida aliment to‘lashdan qochib yurgan erkak uy yerto‘lasidan topilgandi. Qarzdor ota tomonidan qarzdorlik 20 million so‘mdan ortgan. Ishlash maqsadida Toshkent shahriga ketgach, unga nisbatan qidiruv eʼlon qilingan. Xodimlar tomonidan Toshkentdagi xonadon yashash joylari puxta ko‘zdan kechirilganda, yerto‘laga yashirinib olgani aniqlandi. Unga nisbatan 15 sutkalik maʼmuriy qamoq jazosi tayinlandi.
Qashqadaryo viloyati Yakkabog‘ tumanida aliment to‘lamay qochib yurgan erkak Toshkentdagi molxonadan topilgan. Voyaga yetmagan farzandlar uchun to‘lanmagan aliment miqdori 3 million 200 ming so‘m ekani aytilgan.
Shuningdek, Namangan viloyati Chust tumanida aliment to‘lashdan qochib yurgan erkak Ohangarondan topilgan. O‘tkazilgan suhbat mobaynida qarzdorlik salkam 15 million so‘mga yetgani, uni bartaraf etish tushuntirildi. Qayd etilishicha, u yana mas’uliyatni his etmagan va unga nisbatan jinoyat ishi yuritilgan.
Andijon viloyati Shahrixon tumanida esa aliment to‘lashdan qochib, uyining yerto‘lasida yashirinib yurgan erkak ushlanib, 15 sutkaga qamalgan.
Eng antiqa holatlardan biri, Namangan viloyatida aliment to‘lamay yurgan erkak boshqa xotinining uyida yashiringani aniqlangan. Undan qarzdorlik to‘planib, 24,3 million so‘mga borib yetgan edi.
Shu kabi, Qashqadaryoda MIB xodimi 2 yildan beri qidiruvda bo‘lgan qarzdor erkakni berkinayotgan joyida topib olgan. Tadbir jarayonida xodimlardan biri uyning boloxonasi va tomini tekshirayotgan paytda, ikkinchi xodim yiqitilgan ko‘rpalar tagidan fuqaroni olib chiqdi.
Shu kunning o‘zida qarzdor mavjud 28 million 971 ming so‘m aliment qarzdorligini to‘lamagani sababli Jinoyat ishlari bo‘yicha Yakkabog‘ tuman sudi tomonidan B.Buxarovga nisbatan 15 sutka ma’muriy qamoq jazosi tayinlandi.
Surxondaryo viloyati Angor tumanida aliment to‘lamay, 2 yildan buyon qidiruvda bo‘lgan erkak uy yerto‘lasidan topilgan.
Toshkentda uchta xotiniga aliment to‘lamagan erkakning qarzini 4-xotini to‘lagani haqidagi holat ham kuzatilgan. Shundan so‘ng sud tomonidan qarzdorga nisbatan to‘plangan hujjatlar qayta ko‘rilib, yetkazilgan zarar miqdori qoplangani sababli 15 sutkalik qamoq jazosini to‘liq o‘tamasdan ozod qilingan.
Izoh (0)