Namanganda 61 nafar farzand ota-onasiga aliment to‘lab kelmoqda. Bu haqda MIB Namangan viloyat boshqarmasida bo‘lib o‘tgan matbuot anjumanida maʼlum qilindi, deya xabar bermoqda “Daryo” muxbiri Azizbek Abduvaliyev.
Foto: Oqilxon Mamajonov
Jumladan, byuroning Chust tuman bo‘limi ish yurituvida 17 ta, Namangan shahrida 7 ta, Mingbuloq tumanida esa 5 ta shu mazmundagi hujjat mavjud va undirib berilmoqda.
Ota-onasiga aliment to‘lovchilarning 44 nafarini erkaklar, 17 nafarini esa ayollar tashkil etmoqda.
Foto: Oqilxon Mamajonov
Shuningdek, Namanganda 36 nafar ona farzandi uchun aliment to‘lamoqda. Ular orasida to‘lovlardan bo‘yin tovlayotganlar ham uchramoqda.
Foto: Oqilxon Mamajonov
Jumladan, fuqarolik ishlari bo‘yicha Namangan tumanlararo sudining hal qiluv qaroriga ko‘ra, qarzdor D.Y.dan undiruvchi R.R. foydasiga bir nafar farzandi uchun aliment undirish belgilangan. Ushbu hujjat byuroning Namangan tuman bo‘limi ish yurituviga kelib tushgan va harakatlar olib borilgan. Biroq ona farzandi moddiy taʼminotidan bo‘yin tovlagani uchun dastlab 15 sutka maʼmuriy qamoq jazosi belgilangan. Shundan so‘ng ham tegishli xulosa qilmagan va qarzdorlikni to‘lamagan. Unga nisbatan Jinoyat kodeksining 122-moddasi bilan ish qo‘zg‘atilib, jazo muqarrarligi taʼminlandi.
Izoh (0)