Nikohsiz tug‘ilgan farzand tamg‘asi va boy berilgan bolalik: Bollivud yulduzi Rekha kinodagi karyerasini qanday boshlagan?

Bollivudning afsonaviy aktrisalaridan biri Rekhaning karyerasi qay yo‘sinda boshlangan? Tomoshabinlar u haqda qanday fikrda bo‘lgan? Bollywoodtime nashri ushbu savollarga javob beradi.

Rekha Tamil sanoatining ikki yulduzi Jemini Ganeshan va Pushpavalli o‘rtasidagi muhabbat mevasi edi. Uning otasi o‘zini aktyorlikda sinab ko‘rishga qaror qilgan oilali badavlat odam edi. Onasi esa yetakchi aktrisa va mish-mishlarga ko‘ra, u ishlaydigan studiya egasining sevgilisi edi. Jemini va Pushpavalli bir filmda birga rol o‘ynadi va aktrisaning oz bo‘lsa-da mashhurligi Rekhaning otasiga karyera uchun ko‘mak bo‘ldi.

Ko‘p o‘tmay hamkasblar bir-birini sevib qoldi. Studiya egasi Pushpavalliga shart qo‘ydi: yo oilali erkak bilan munosabatlarni tugatadi yoki u kinodagi faoliyatini yakunlaydi. Pushpavalli qalbiga quloq soldi va muhabbatni tanladi. Natijada hech narsaga erisha olmay, studiyani tark etdi. Oradan 5 yil o‘tib, uning oilali sevgilisi Bollivud ko‘rgan eng katta kino yulduzlaridan biriga aylandi. Ammo Pushpavalli ikki qizi bilan karyerasiz yolg‘iz qoldi.

Sobiq aktrisa badavlat va mashhur ota tomonidan unutilgan bolalari bilan qashshoqlik yoqasida kun kechirardi. Afsuski, Rekha nikohsiz tug‘ilgan farzand edi. Rekha oilada o‘rtancha farzand bo‘lib, u va uning opasi Radhaning ham otasi Jemini Ganeshan. So‘ngra kambag‘al oilada yana bir noqonuniy bola dunyoga keldi. Hech bir bolasi uchun Pushpavlliga aliment to‘lanmagani tufayli ham ular arang hayot kechirardi.

Rekha hamma qiyinchiliklardan tashqari, juda mashhur otaning qizi bo‘lishning mas’uliyatiga ham ega edi. Bo‘lajak aktrisaning sinfdoshlari va do‘stlari uning hikoyasini undan ham yaxshiroq bilardi. Maktabda uni haqoratlashar, Rekha esa ularning masxaralariga javob bermaslik uchun “terisini qalin” qilishi kerak edi.

Rekha ulg‘ayib, filmlarda suratga tusha boshlaganida, uning haqiqiy iste’dod egasi ekani namoyon bo‘ldi. Bollivud kino prodyuseri unga shartnoma imzolash uchun katta pul taklif qilganidan so‘ng ona juda yosh qizini yolg‘iz Bombeyga ishlash va butun oilani boqish uchun yuborishdan tortinmadi. Bunday vaziyatda Rekha taklifni rad etib, muvaffaqiyatsizlikka bo‘yin egsa, 5 kishi ochlikdan o‘lishi tayin edi.

14 yashar Rekhaning yonida na oilasi, na boshqa yaqini bor edi. Rejissor darrov bo‘sa olish sahnasi film uchun yaxshi reklama bo‘ladi, deb qaror qildi. Ommaviy axborot vositalarida yosh Rekha behayolikning timsoli sifatida tilga olindi. Filmdagi muhabbat haqiqiyligi va uni tarannum etuvchi boshqa sahnalar aktrisaning o‘ziga ham yoqib tushganligi haqida yozishdi. Shu tarzda aktrisa turli xil tanqidlar ichiga ko‘milib ketdi. Rekha o‘sha yillarning tomoshabinlari tasavvurida yengiltak aktrisa sifatida namoyon bo‘ldi.

Bollivudda o‘tgan asrning 70-yillarning boshlari mashhurlar haqidagi dahshatli maqolalari davri edi. Yirik nashrlar ko‘pincha intervyu uyushtirib, ularning obro‘sini yanada oshirar edi. Rekhaning suratga olish maydonchasidagi xatti-harakatlari ham jurnal sahifalarini to‘ldirdi.

Rekhaga nisbatan bo‘lgan shov-shuvlardan keyin u ikki marotaba jiddiy munosabatga kirishdi. Avval Jitendra, keyin esa Vinod Mehra bilan. Aytishlaricha, u Vinod bilan shar’iy nikohda bo‘lgan, lekin rasmiy ravishda turmush qurmagan. Vinodning onasi esa ularning birga bo‘lishiga ruxsat bermagan.

Bundan tashqari, karyerasining boshida Rekha bu kasbga jiddiy qarashdan bosh tortdi. U o‘zini maktab o‘quvchisi kabi tutdi, darslarni qoldirdi, parhez, bo‘yanish, kostyumlardan nafratlandi. U imkon qadar kamroq ishlashni, suratga tushishni o‘tkazib yuborishni xohlardi, buning o‘rniga do‘konlarda aylanishga va hayotdan zavqlanishga vaqt sarflardi.

Shunday qilib bu Rekhaning Bollivud olamiga kirib kelishi edi. U ommaviy axborot vositalari bong urganidek yengiltak aktrisa singari tuzoqqa tushishiga bir baxya qoldi. Albatta, bunday aktrisalar bir lahzada yo‘q bo‘lib ketadi yoki ikkinchi darajali rollarni o‘ynaydi.

Tez orada u o‘zini, qiyofasini va ishga munosabatini butunlay o‘zgartirdi. Uning hayotiga Bollivvud qiroli Amitabh Bachchan ham kirib keldi. Bu aktrisaning karyerasi gullab-yashnagan vaqtga to‘g‘ri keldi. Mashhur aktrisani yangi sahifa va sarguzashtlar karyerasining navbatdagi bosqichida kutib turar edi.