Andijon viloyati Bo‘ston tumanida alimentdan qarzi bor ota qurilish uchun tayyorlab qo‘ygan qopdagi sementlarining bir qismidan ayrildi. Bu haqda MIB “Daryo”ga ma’lum qildi.
“Bo‘ston tumanida yashovchi M.S. sud hujjatiga ko‘ra bir nafar farzandi ta’minoti uchun Y.T. foydasiga aliment to‘lab borishi belgilansa-da, to‘lovlarga befarqlik bilan qarab kelgan.
Yig‘ilib qolgan 7,4 mln so‘m aliment qarzdorligini undirish maqsadida qarzdorning yashash manziliga borilganda, uyida qurilish qilish maqsadida 2 tonnadan ziyod sement mahsuloti olib qo‘ygani aniqlandi.
Ijro harakatlari davomida bir farzandi uchun aliment to‘lashdan bo‘yin tovlab yurgan otaning 41 qop sementi tegishlicha xatlab qo‘yildi”, deyiladi xabarda.
Avvalroq Andijon viloyati Xo‘jaobod tumanida yashovchi erkak sobiq turmush o‘rtoqlariga aliment to‘lamagani uchun Cobalt avtomashinasi xatlangani haqida xabar berilgandi.
Shuningdek, Toshkentda yashovchi erkak aliment uchun 818 million so‘m miqdorida to‘lovni amalga oshirgani ma’lum qilingan.
U bitta uy, Spark avtotransport vositasi va 2 ming AQSH dollarini sobiq turmush o‘rtog‘iga aliment o‘rnida taqdim qilgan.
Izoh (0)