Qashqadaryo viloyatining Dehqonobod tumanida aka-ukalar ota-onasining moddiy taʼminoti uchun oldindan 5 ming dollar aliment pullarini to‘lab berdi. Bu haqda “Daryo”ga MIBning viloyat boshqarmasi axborot xizmati rahbari Gulnoza Dilmurodova xabar berdi.
Taʼkidlanishicha, aka-ukalar xorijga chiqish uchun ota-onasiga aliment to‘lashga rozi bo‘lgan.
“Oila kodeksining 109-moddasiga ko‘ra, voyaga yetgan, mehnatga layoqatli bolalar mehnatga layoqatsiz, yordamga muhtoj o‘z ota-onasiga taʼminot berishlari va ular to‘g‘risida g‘amxo‘rlik qilishlari shart. Majburiy ijro byurosi organlari ish yurituvida ota-onalardan farzandlariga aliment undirish bilan bir qatorda, bolalardan ham ota-onasiga moddiy taʼminot undirish to‘g‘risidagi ijro hujjatlari mavjud.
Jumladan, byuroning Dehqonobod tuman bo‘limi ish yurituvida Fuqarolik ishlari bo‘yicha G‘uzor tumanlararo sudining ijro varaqasiga asosan javobgarlar Sh.B. va D.B.larning har biridan mehnatga haq to‘lashning eng kam miqdorining ikkidan bir qismi miqdorida qatʼiy summada aliment undirish belgilangan. Olib borilgan ijro harakatlari davomida qarzdorlar xorijga chiqmoqchi ekanini bildirgan. Bo‘lim xodimlari tomonidan berilgan huquqiy tushuntirishlar natijasida aka-ukalar 5 yillik aliment pulini oldindan to‘lab berish uchun murojaat qilgan”, — deydi MIBning Dehqonobod tuman bo‘limi boshlig‘i Kamol Ro‘ziyev.
Qo‘shimcha qilinishicha, taraflarning o‘zaro kelishuvi natijasida joriy yilning 25-aprel kuni farzandlar ota-onasiga naqd shaklda aliment pulini to‘lab bergan.
Izoh (0)