Klaudio Ranyerining “Roma”ga bosh murabbiy sifatida kelishi klub uchun unutilmas davr bo‘ldi. Kuz faslidan beri jamoani boshqarib kelayotgan tajribali mutaxassis qisqa fursatda “bo‘rilar” o‘yiniga ijobiy ta’sir ko‘rsatdi. So‘nggi ikki oy ichida ko‘rsatilgan yuqori darajadagi futboli tufayli endilikda “Roma” yana Yevrokuboklar yo‘llanmasi uchun kurashmoqda.
Ammo Paulo Dibalaning olgan jarohati fonida, ko‘pchilik futbol ishqibozlari klubning kuchli yettilikka kira olishiga shubha bilan qaramoqda. Shunga qaramay, rimliklar hozirda e’tiborini yozgi transferlar oynasiga qaratmoqda. Maqsad — tarkibni kuchaytirib, keyingi mavsumlarda Chempionlar Ligasi yo‘llanmasi uchun muntazam kurasha oladigan darajaga chiqish. Rejalarning ko‘pi A Seriya yakuniga bog‘liq bo‘ladi. Ammo “Roma” aynan qanday futbolchilarni o‘z safiga qo‘shishni rejalashtiryapti? Hozir shu borasida biroz to‘xtalishga qaror qildik.
Markaziy himoyachi
Mats Hummelsning klub bilan shartnomasi yakunlanayotgan bir paytda, “Roma” markaziy himoyani kuchaytirishni rejalashtiryapti. Klub rahbariyati e’tiborini tortgan nomzodlardan biri — “PSV” himoyachisi Olivye Boskali.
27 yoshli fransiyalik himoyachi bu mavsumda Niderlandiya chempionatida 23 o‘yinda maydonga tushdi va Chempionlar Ligasida 10 ta bahsda qatnashdi. Boskali joriy mavsum yaxshi o‘yin namoyish etmoqda, xususan u havodagi kurashlarda o‘rtacha 1,3 marta g‘alaba qozongan bo‘lsa, to‘p uzatishdagi aniqlik 88,6 foizni tashkil qilmoqda. Olivye mazkur jihatlari bilan “Roma” himoyasiga katta foyda keltirishi mumkin. Shu bois klub rahbariyati futbolchini o‘z safiga qo‘shib olish uchun harakat boshlagan.
Chap qanot hujumchisi
“Roma” safida uzoq yillardan beri harakat qilayotgan Stefan El-Sharavi hali klub bilan yangi shartnoma borasida kelishib olgani yo‘q. Shu sababli, rimliklar chap qanotga yangi vinger izlamoqda. Hozirgi paytda ehtimoliy transfer sifatida “Bavariya” futbolchisi Leroy Sane nomzodi ko‘rib chiqilmoqda.
Germaniyalik futbolchi joriy mavsum Bundesligada 22 o‘yinda ishtirok etib, 7 ta gol kiritgan hamda 4 ta assist qayd etgan. Chempionlar Ligasida esa 4 ta bahsda 1 marta raqib darvozasini ishg‘ol qildi. Sane 2026-yil yanvarida 30 yoshga to‘ladi. “Bavariya” yosh futbolchilarga e’tibor qaratmoqda. Shuning uchun, uning myunxenliklar safidagi kelajagi mavhum bo‘lib turibdi. “Roma” Chempionlar Ligasi yo‘llanmasini qo‘lga kiritsa, uning xizmatlariga da’vogarlar ro‘yxatidan joy olishi xabar qilingan. Ehtimol futbolchi ham bu taklifni rad etmasligi mumkin.
O‘ng qanot hujumchisi
Yozda “Roma” o‘ng qanotga ham futbolchi olib kelishni rejalashtiryapti. Hozirda “Chelsi”da ijara asosida o‘ynayotgan Jeydon Sancho “bo‘rilar”ning “radarida” bo‘lib turibdi. Rim klubi “Manchester Yunayted”da omadsizlikka uchragan ingliz futbolchisi uchun yangi sahifa ochib berishi mumkin.
Sancho bu mavsum “Chelsi”da o‘rtacha mavsum o‘tkazdi. U klub safida 39 o‘yinda ishtirok etib, o‘z hisobiga 4 ta gol va 10 ta golli uzatma yozdirib qo‘ygan. Ammo “aristokratlar” uni to‘liq sotib olishdan bosh tortgani aytilmoqda. Sancho “Yunayted”dagilar bilan janjali sabab klubdan ketishi kutilmoqda. “Roma” esa uning tezligidan foydalangan holda o‘ng qanotni kuchaytirishi mumkin.
Tayanch yarim himoyachi
“Roma” yarim himoyaning orqa chizig‘ini ham kuchaytirish haqida o‘ylamoqda. Hozir bu joyda Manu Kone va Leandro Paredes asosiy rollarni bajarmoqda. Biroq Paredesning yoshi o‘tib borayotgani va shartnomasining tugashiga bir yil qolganini inobatga olib, klub yangi nomzod izlayapti.
Bu borada “Arsenal” futbolchisi Tomas Parti klub uchun mos variant sifatida ko‘rinmoqda. Gana terma jamoasi a’zosi bu mavsumda Angliya Premyer Ligasida 28 ta o‘yinda ishtirok etib, 5 golda ishtirok etdi. Uning har bir uchrashuvdagi o‘rtacha uzatma aniqligi 88,8 foizni tashkil qilmoqda.
Hujumchi
Yevropadagi deyarli barcha jamoalar kabi, “Roma” ham hujum chizig‘ini kuchaytirishga harakat qilmoqda. Ayniqsa, Paulo Dibalaning jarohati fonida bu ehtiyoj yanada kuchaygan.
Hozircha asosiy hujumchi sifatida Artyom Dovbik va Eldor Shomurodov hisoblanadi. Biroq jamoa ularga raqobatchi olib kelishni istamoqda. Shuningdek, OAVda ukrainalik futbolchi sobiq klubi “Jirona”ga qaytishi mumkinligi borasida mish-mishlar tarqalgan. Shuning uchun rimliklar ehtimoliy transfer sifatida bir nechta hujumchilarni “short-listi”ga qo‘shib qo‘yibdi. Bu borada “Everton” futbolchisi Dominik Kalvert-Lyuin variant sifatida ko‘rilmoqda. 28 yoshli hujumchi bu mavsum APLda 19 o‘yinda qatnashib, 3 gol urgan bo‘lsa-da, yangi muhitda o‘zini tiklashi mumkinligi aytilmoqda. Shuningdek, uning transfer summasi ham klub uchun qulay bo‘lishi mumkin. U “Roma” uchun byudjetga mos va foydali transfer bo‘lishi taxmin qilinmoqda.
Izoh (0)