Qozog‘iston prezidenti Qosim-Jo‘mart To‘qayev ota-onasi bilan tushgan bolaligidagi suratini e’lon qildi va onasi haqida gapirib o‘tdi. Uning yozishicha, bo‘lajak prezident to‘rt farzandli oilada dunyoga kelgan. Ular oddiy va kamtarona hayot kechirgan. Bu haqida u o‘zining Instagram sahifasida ma’lum qildi.
To‘qayevning hikoya qilishicha, onasi doim uy ishlari bilan shug‘ullangan. Oila boquvchisi faqat otasi bo‘lib, u oylik ish haqidan tashqari, ba’zan maqola va kitoblari uchun gonorar ham olib turgan.
“Har qancha yosh va go‘zal ayol bo‘lganiga qaramay, onam o‘zini ko‘p narsalarda cheklardi, xususan, qimmatbaho taqinchoqlar va kiyim-kechaklardan voz kechgan edi. Albatta, u ham nafis kiyinishni, chiroyli bezaklar taqishni xohlagan bo‘lishi tabiiy, ammo butun hayotini farzandlariga bag‘ishladi va qisqa umrining so‘ngigacha onalik burchini sadoqat bilan bajardi. Hatto qimmatbaho buyumlar sotib olish imkoni bo‘lsa ham o‘ziga yoqqan narsalarni nevaralariga sovg‘a qilardi”, deb eslaydi Qozog‘iston rahbari.
Prezident bolaligini xotirlar ekan, hayotidagi eng og‘ir pallalardan biri — Sovet Ittifoqining parchalanishi davri ekanini va o‘sha vaqtdagi onasining mardonavor qo‘llab-quvvatlovini hech qachon unutmasligini qo‘shimcha qilgan.
“O‘sha vaqtda men Rossiya tashqi ishlar vazirligida ishlashda davom etishmi yoki vatanga qaytishmi, degan muhim qarorni qabul qilishim kerak edi. Eslayman, onam shunday degan edi: “Agar otang tirik bo‘lganida, u albatta senga Qozog‘istonga xizmat qilish kerakligini aytgan bo‘lardi”. Bu so‘zlar menga amrdek yangragan edi”, deya yozgan u.
Shuningdek, To‘qayev onasi bolaligida ko‘plab ibratli hikoyalar so‘zlab bergani va keyinchalik bu hikoyalar bo‘lajak prezident dunyoqarashini shakllanishida jiddiy rol o‘ynaganini so‘zlab berdi.
“Meni har doim onam qo‘llab-quvvatlab turgan. Bolaligimdan u chuqur ma’noli voqealarni so‘zlab berar, fikrlari va qarashlari bilan baham ko‘rardi. U juda yaxshi hikoyachi edi, uning har bir so‘zini diqqat bilan eshitganimni his qilgan bo‘lsa kerak. Onamning hikoyalari dunyoqarashimga jiddiy ta’sir ko‘rsatgan”, deydi To‘qayev.
Shu bilan birga, prezident onasidan atrofga jiddiy qarashni, o‘zini nazorat qilishni, yaxshi narsalardan saboq olib, hayotga tatbiq qilishni o‘rganganini aytgan.
“Ertalabdan kun davomida nima qilishingni o‘ylab qo‘y. Inson tartibli bo‘lishi kerak, chalg‘igan odam muvaffaqiyatsizlikka uchraydi, derdi ”, deya eslaydi Qosim-Jo‘mart To‘qayev.
Izoh (0)