Ukraina prezidenti Vladimir Zelenskiy amerikalik hamkasbi Donald Trampni “tinchlik rejasi”ni amalga oshirishdan oldin Ukrainaga kelishga chaqirdi. Bu haqda CBS News xabar berdi.
Zelenskiy har qanday qaror qabul qilish va muzokaralar rejasini tuzishdan oldin Tramp “bu yerda nima bo‘layotganini tushunishi” kerakligini aytdi.
Biz sizning pozitsiyangizni hurmat qilamiz. Ammo iltimos, har qanday qaror qabul qilishdan, muzokaralar rejalarini tuzishdan oldin odamlar, tinch aholi, askarlar, shifoxonalar, cherkovlar, vayron bo‘lgan yoki halok bo‘lgan bolalarni kelib ko‘ring.
Kelinglar, ko‘ringlar, keyin urushni qanday tugatish rejasini birgalikda ishlab chiqamiz. Kim bilan bitim tuzganingizni tushunasiz. Putin nima qilganini anglaysiz, dedi u AQSH rahbariga yo‘llagan taklifnomasida.
Rossiyaning raketa hujumlari haqida gapirar ekan, Zelenskiy muzokaralarda ularga ishonib bo‘lmasligini ma’lum qildi.
Xalqimiz eng og‘ir, eng yuqori narxni to‘lamoqda. Bunday og‘irroq narx yo‘q. Bizda bor barcha pulimizni — moliyaviy jihatdan mavjud bo‘lgan hamma narsani berdik. Ammo eng asosiysi odamlarimizning (hayotini) fido qildik, dedi siyosatchi.
U, shuningdek, Tramp Ukrainani qo‘llab-quvvatlashi kerakligini ta’kidladi va AQSHning betaraf qolmoqchi bo‘layotganini noto‘g‘ri deb hisoblashini bildirdi. Zelenskiy, afsuski, AQSHda Rossiyaning targ‘ibotlari, ya’ni narrativlari ustunlik qilayotganini qayd etdi.
Bizning yo‘qotishlarimiz va azob-uqubatlarimizga guvoh bo‘lib, ruslarning nima qilayotganini tushunib turib, qanday qilib ularni tajovuzkor emas, urushni ular boshlamagan deb hisoblash mumkin? Bu Rossiyaning axborot siyosati AQSHga, Amerika siyosatiga va siyosatchilariga qanchalik katta ta’sir o‘tkazayotganidan dalolat beradi, deya xulosa qildi Ukraina prezidenti.
Rossiyaning Sumiga hujumida 34 kishi halok bo‘ldi
-kmtF_y-Y.avif)
Rus armiyasi 13-aprel kuni Ukrainaning Sumi shahriga ballistik raketalar bilan hujum qildi. Aviazarbalar oqibatida halok bo‘lganlar soni 34 kishiga yetdi. Jarohatlanganlar soni 117 kishini tashkil etmoqda, ulardan 15 nafari bolalardir.
Biz Rossiyaga terrorchi nimaga loyiq bo‘lsa, shunday munosabatda bo‘lishimiz kerak... Putin Amerikaning o‘t ochishni to‘liq va so‘zsiz to‘xtatish taklifini e’tiborsiz qoldirganiga 2 oy bo‘ldi. Afsuski, Moskvadagilar odam o‘ldirishni davom ettirishiga haqli ekanliklariga ishonmoqda. Vaziyatni o‘zgartirish uchun harakat qilish zarur, dedi siyosatchi.
U qurbonlarning oilasiga va yaqinlariga hamdardlik bildirdi. Oliy Radadan xalq deputati Maryana Bezuglaya zarba nishoni mukofotlash uchun to‘plangan ukrainalik harbiylar bo‘lganini aytdi. U Ukraina armiyasi bosh qo‘mondoni Aleksandr Sirskiy va hududiy mudofaa qo‘mondoniga murojaat qilib, “fuqarolik shaharlari”da bunday amaliyotni to‘xtatishni talab qildi va “axborot sizib chiqishi” sodir bo‘lganini aytdi.
-Q7XUdNVK.avif)
Izoh (0)