Bu mashhur yulduzlar o‘z ahvolini yashirishni istamasdan, sog‘liqlaridagi muammolar haqida dunyoga ochiqchasiga so‘zlab berishdi.
Selena Gomes
2015-yilda amerikalik aktrisa va qo‘shiqchi Selena Gomesga qizil volchanka tashxisi qo‘yilgan — bu autoimmun kasallik bo‘lib, unda immunitet tizimi tananing o‘z to‘qimalariga hujum qiladi. Kasallik oqibatida uning buyraklari ishdan chiqqan va 2017-yilda unga buyrak ko‘chirib o‘tkazilgan, unga dugonasi Fransiya Raysa donor bo‘lgan.
2020-yilda Gomes o‘ziga bipolyar buzilish tashxisi qo‘yilganini ma’lum qildi. U “Selena Gomes: ongim va men” nomli hujjatli filmda o‘zi haqida so‘zlab, ruhiy salomatlik bilan bog‘liq muammolari, jumladan, depressiya va xavotir davrlarini batafsil tasvirlagan. Aktrisa kasalliklari tufayli farzand ko‘ra olmasligini, biroq surrogat onalik yoki farzandlikka olish orqali ona bo‘lish imkoniyatini ko‘rib chiqayotganini aytadi.
Sog‘lig‘i bilan bog‘liq muammolar tufayli u semirib ketdi. Shundan so‘ng Gomesning tashqi ko‘rinishi tanqidga uchradi. 2023-yil avgust oyida san’atkor qo‘li singandan keyin yana bir bor jarrohlik amaliyotidan o‘tganini ma’lum qildi.
2020-yilda Gomes yoshlarning ruhiy salomatligini qo‘llab-quvvatlash maqsadida Rare Impact Fund jamg‘armasini tashkil etdi. Jamg‘arma uning Rare Beauty kosmetika brendi sotuvining 1 foizi hisobidan moliyalashtiriladi va butun dunyo bo‘ylab yoshlar uchun ruhiy salomatlik xizmatlaridan foydalanish imkoniyatlarini kengaytirishga qaratilgan.
Jiji Hadid
Amerikalik supermodel Jiji Hadid 2016-yilda o‘zida qalqonsimon bezning surunkali autoimmun kasalligi — Xashimoto aniqlangani haqida xabar berdi. Bu kasallik charchoq, tana haroratini boshqarishning buzilishi, vazn o‘zgarishi va boshqa belgilarga sabab bo‘lishi mumkin.
Hadid tashqi ko‘rinishidagi o‘zgarishlar bilan bog‘liq tanqidlarga javoban kasalligi haqida ochiqchasiga so‘zladi. U Xashimoto kasalligi o‘zining moddalar almashinuvi va umumiy salomatligiga ta’sir ko‘rsatganini ta’kidladi. Model tibbiy yordam tufayli ahvolini barqarorlashtirganini va kasbiy faoliyatini davom ettirishga erishganini aytdi.
Bella Hadid
Jijining singlisi, amerikalik supermodel Bella Hadid 2012-yildan beri kana chaqishi orqali yuqadigan Laym kasalligidan aziyat chekib kelmoqda. Bu kasallik uning onasi Iolanda va ukasi Anvarda ham aniqlangan.
2023-yilda stomatologik jarrohlik amaliyoti tufayli uning kasalligi zo‘rayib ketdi. Model 100 kundan ortiq vaqt davomida tomizgichlar va boshqa tibbiy muolajalarni o‘z ichiga olgan intensiv davolanishdan o‘tdi. Hadidning ta’kidlashicha, qiyinchiliklarga qaramay, bu tajriba uni yanada kuchliroq qilgan va bugungi kundagi shaxsga aylanishiga yordam bergan.
2024-yilda davolanish kursini yakunlagach, Bella Hadid modellik faoliyatiga qaytdi va yana podiumda namoyon bo‘ldi.
Kim Kardashyan
Amerikalik tadbirkor va model Kim Kardashyan 2011-yildan buyon psoriaz deb ataladigan surunkali autoimmun teri kasalligidan aziyat chekib kelmoqda. 2019-yilda unga bo‘g‘imlar yallig‘lanishiga sabab bo‘ladigan psoriatik artrit tashxisi ham qo‘yilgan.
2024-yil fevral oyida Kardashyan psoriaz kuchayganini, oyoq terisida yallig‘lanish va qizarish paydo bo‘lganini ma’lum qildi. U ovqatlanish tartibini o‘zgartirmagani va kasallikka qarshi turli vositalarni sinab ko‘rganiga qaramay, kasallik sababini aniqlay olmaganini ta’kidladi.
2019-yilda “Kardashyanlar oilasi” realiti-shousida Kardashyanning qon tahlillari qizil yuguruk va revmatoid artritga xos antitanachalar mavjudligini ko‘rsatdi. Biroq uning davolovchi shifokori antitanachalarning topilishi kasallik borligini aniq tasdiqlamasligini uqtirdi. Kardashyan qo‘l-oyoqlarida uvishish, bosh og‘rig‘i va umumiy holsizlikni his qilayotganini aytib o‘tdi.
Bryus Uillis
2022-yil mart oyida Bryus Uillisning oilasi aktyorda afaziya — gapirish, nutqni tushunish, o‘qish va yozish qobiliyatiga ta’sir qiluvchi nutq buzilishi tashxisi qo‘yilganini ma’lum qildi. 2023-yil fevralda tashxis aniqlanib, Uillisda peshona-chakka demensiyasi (PCHD) borligi aniqlandi. Uillisning oilasi hozirda bu kasallikni davolash usullari yo‘qligini ta’kidladi, ammo yaqin yillar ichida vaziyat o‘zgarishiga umid bildirdi.
Tashxis qo‘yilgach, Uillis aktyorlik faoliyatini yakunladi. Hozirda u oilasining doimiy parvarishida. Uning rafiqasi Emma Heming va sobiq rafiqasi Demi Mur, shuningdek, besh qizi aktyorni faol qo‘llab-quvvatlab, ijtimoiy tarmoqlarda uning ahvoli haqida ma’lumot ulashmoqda.
Ayni paytda kasallik zo‘rayib bormoqda: Uillisning nutqi va xotirasida jiddiy buzilishlar kuzatilmoqda. Shunday bo‘lsa-da, 2025-yil yanvarda Bryus Uillis tashxis qo‘yilganidan keyin ilk bor jamoatchilik oldiga chiqib, Kaliforniyadagi yong‘inlarni o‘chirishda qatnashgan qutqaruvchilarga minnatdorlik bildirdi.
Izoh (0)