Aktyorning gonorari — uning daromadi bo‘lib, undan kamdan kam odam o‘z ixtiyori bilan voz kechadi. Ammo ba’zida shunday bo‘lishi ham mumkin, masalan filmda rol ijro etgan aktyorlarga umuman gonorar berilmaydi.
Bred Pitt — “Dedpul-2”
“Dedpul-2” — 2018-yilda suratga olingan mashhur filmlardan biri. Loyihada Rayan Reynolds, Josh Brolin va Zazi Betsdan tashqari boshqa taniqli aktyorlar rol o‘ynagan. Epizodik rollarda Mett Deymon, Bill Skarsgard va hatto Bred Pittni ham ko‘rish mumkin. Ma’lum bo‘lishicha, Bred Pitt “Dedpul-2”dagi rolini bir chashka qahva uchun o‘ynagan. Ammo aktyor shart qo‘ygan: Rayan Reynolds unga ichimlik olib kelsagina, u rozi bo‘ladi. Keyinchalik Reynolds tan olganidek, bunday shart Pittning tekinga ishlashi ham mumkinligini hammaga bildirish uchun eng zo‘r variant edi.
Bryus Uillis — “To‘rt xona”
1995-yilda “To‘rt xona” komediyasining premyerasi bo‘lib o‘tdi. Loyihada ko‘plab mashhur Gollivud aktyorlari rol o‘ynagan. Qizig‘i, Bryus filmda tekinga o‘ynashni xohlaydi va shunday qiladi ham. Ammo uning nomi titrlarga kiritilmaydi, chunki aktyor bu harakati bilan o‘zi a’zo bo‘lgan Amerika kinoaktyorlari gildiyasining qoidalaridan birini buzgan. Qoidaga ko‘ra, filmdagi barcha rollarga gonorar to‘lanishi kerak.
Jonni Depp, Jud Lou, Kolin Farrell — “Doktor Parnas xayoloti”
“Doktor Parnas xayoloti” filmi tomoshabinlar xotirasida fojia sifatida qolgan: bosh rol ijrochisi Xit Lejer suratga olish vaqtida olamdan o‘tgan. Aktyor bosh rolni o‘ynagan, shuning uchun film taqdiri shubha ostida qolgandi.
Ammo rejissor suratga olishni davom ettirishga qaror qiladi va bir vaqtning o‘zida bir nechta Gollivud yulduzlari — Jonni Depp, Jud Lou, Kolin Farrellni taklif qiladi. Uchalasi ham filmda nafaqat rol o‘ynagan, balki gonorardan ham voz kechgan: pul Xit Lejer qizining hisob raqamiga o‘tkazilgan.
Mark Uolberg — “Jangchi”
Mark Uolberg — ko‘plab qiziqarli filmlarda ishtirok etgan iste’dodli aktyor. Markning so‘zlariga ko‘ra, “Jangchi” dramasi u orzu qilgan loyiha edi va aktyor loyihada rol o‘ynash uchun gonorardan bosh tortdi va mablag‘ning hammasini murabbiylarga berdi. U uzoq vaqt davomida rolga tayyorlandi va oxirida o‘zi kutgan natijaga erishdi. E’tiborlisi, urinishlarga qaramay, hamma ham “Jangchi” loyihasini qadrlamadi, film tanqidlarga sabab bo‘ldi. Biroq, bu Mark Uolbergga zarar keltirmadi.
Ranvir Singx — “Fennini izlab”
Ranvir Singx — mashhur Bollivud aktyorlaridan biri. U kino olamga kirib kelgan yillari o‘ziga berilgan barcha rollarni mahorat bilan ijro etdi va keyinchalik mashhur filmlarda suratga tusha boshladi. Aktyor “Fennini izlab” filmida tomoshabinlar ko‘z o‘ngida o‘zgacha ampulada paydo bo‘ldi. Aktyor o‘z xarakterining obrazini o‘ylab topganiga qo‘shimcha ravishda, ijrosi uchun berilgan gonorarni ham olmadi. Ranvir shunchaki loyihada ko‘rinishni va kichik bo‘lsada yangi rol bilan muxlislarni xursand qilishni xohladi. Yorqin rangli kostyum va grim tufayli muxlislar bu g‘alati qahramonni sevimli aktyori sifatida tan olmadi.
Rebekka Xoll va Timoti Shalame — “Nyu-Yorkdagi yomg‘irli kun”
2020-yilda Vudi Allen o‘zining navbatdagi filmini taqdim etdi. “Nyu-Yorkdagi yomg‘irli kun” romantik komediyasi tanqidchilardan asosan ijobiy baho olgan. Aktyorlar shunchaki ajoyib edi: Timoti Shalame, El Fenning, Jud Lou, Rebekka Xoll va qo‘shiqchi Selena Gomes. E’tiborli jihati, Rebekka va Timoti ushbu filmdagi gonorarlaridan voz kechib, pullarni xayriya ishlariga bergan.
Bryus Uillis — “Do‘stlar”
1994-yilda Amerikaning mashhur “Do‘stlar” serialining birinchi qismi chiqdi. Loyiha boshlanishida bosh rolni ijro etgan aktyorlar unchalik taniqli bo‘lmagan bo‘lsa, biroz vaqt o‘tib ular haqiqiy yulduzga aylandi. Keyinchalik loyihada nafaqat mashhur xonandalar, balki aktyorlar ham suratga tusha boshladi. Bryus Uillis ulardan biri edi. Muxlislarning fikricha, aktyor Mettyu Perri bilan kelishmovchilik tufayli serialda rol ijro etgan va bir nechta epizodlar uchun gonorar olmagan. Aslida, Bryus Uillis barcha pullarini xayriya ishlariga sarflagan.
Izoh (0)