Бу машҳур юлдузлар ўз аҳволини яширишни истамасдан, соғлиқларидаги муаммолар ҳақида дунёга очиқчасига сўзлаб беришди.
Селена Гомес
2015 йилда америкалик актриса ва қўшиқчи Селена Гомесга қизил волчанка ташхиси қўйилган — бу аутоиммун касаллик бўлиб, унда иммунитет тизими тананинг ўз тўқималарига ҳужум қилади. Касаллик оқибатида унинг буйраклари ишдан чиққан ва 2017 йилда унга буйрак кўчириб ўтказилган, унга дугонаси Франция Райса донор бўлган.
2020 йилда Гомес ўзига биполяр бузилиш ташхиси қўйилганини маълум қилди. У “Селена Гомес: онгим ва мен” номли ҳужжатли фильмда ўзи ҳақида сўзлаб, руҳий саломатлик билан боғлиқ муаммолари, жумладан, депрессия ва хавотир даврларини батафсил тасвирлаган. Актриса касалликлари туфайли фарзанд кўра олмаслигини, бироқ суррогат оналик ёки фарзандликка олиш орқали она бўлиш имкониятини кўриб чиқаётганини айтади.
Соғлиғи билан боғлиқ муаммолар туфайли у семириб кетди. Шундан сўнг Гомеснинг ташқи кўриниши танқидга учради. 2023 йил август ойида санъаткор қўли сингандан кейин яна бир бор жарроҳлик амалиётидан ўтганини маълум қилди.
2020 йилда Гомес ёшларнинг руҳий саломатлигини қўллаб-қувватлаш мақсадида Rare Impact Fund жамғармасини ташкил этди. Жамғарма унинг Rare Beauty косметика бренди сотувининг 1 фоизи ҳисобидан молиялаштирилади ва бутун дунё бўйлаб ёшлар учун руҳий саломатлик хизматларидан фойдаланиш имкониятларини кенгайтиришга қаратилган.
Жижи Ҳадид
Америкалик супермодел Жижи Ҳадид 2016 йилда ўзида қалқонсимон безнинг сурункали аутоиммун касаллиги — Хашимото аниқлангани ҳақида хабар берди. Бу касаллик чарчоқ, тана ҳароратини бошқаришнинг бузилиши, вазн ўзгариши ва бошқа белгиларга сабаб бўлиши мумкин.
Ҳадид ташқи кўринишидаги ўзгаришлар билан боғлиқ танқидларга жавобан касаллиги ҳақида очиқчасига сўзлади. У Хашимото касаллиги ўзининг моддалар алмашинуви ва умумий саломатлигига таъсир кўрсатганини таъкидлади. Модель тиббий ёрдам туфайли аҳволини барқарорлаштирганини ва касбий фаолиятини давом эттиришга эришганини айтди.
Белла Ҳадид
Жижининг синглиси, америкалик супермодел Белла Ҳадид 2012 йилдан бери кана чақиши орқали юқадиган Лайм касаллигидан азият чекиб келмоқда. Бу касаллик унинг онаси Иоланда ва укаси Анварда ҳам аниқланган.
2023 йилда стоматологик жарроҳлик амалиёти туфайли унинг касаллиги зўрайиб кетди. Модель 100 кундан ортиқ вақт давомида томизгичлар ва бошқа тиббий муолажаларни ўз ичига олган интенсив даволанишдан ўтди. Ҳадиднинг таъкидлашича, қийинчиликларга қарамай, бу тажриба уни янада кучлироқ қилган ва бугунги кундаги шахсга айланишига ёрдам берган.
2024 йилда даволаниш курсини якунлагач, Белла Ҳадид моделлик фаолиятига қайтди ва яна подиумда намоён бўлди.
Ким Кардашьян
Америкалик тадбиркор ва модел Ким Кардашьян 2011 йилдан буён псориаз деб аталадиган сурункали аутоиммун тери касаллигидан азият чекиб келмоқда. 2019 йилда унга бўғимлар яллиғланишига сабаб бўладиган псориатик артрит ташхиси ҳам қўйилган.
2024 йил февраль ойида Кардашьян псориаз кучайганини, оёқ терисида яллиғланиш ва қизариш пайдо бўлганини маълум қилди. У овқатланиш тартибини ўзгартирмагани ва касалликка қарши турли воситаларни синаб кўрганига қарамай, касаллик сабабини аниқлай олмаганини таъкидлади.
2019 йилда “Кардашьянлар оиласи” реалити-шоусида Кардашьяннинг қон таҳлиллари қизил югурук ва ревматоид артритга хос антитаначалар мавжудлигини кўрсатди. Бироқ унинг даволовчи шифокори антитаначаларнинг топилиши касаллик борлигини аниқ тасдиқламаслигини уқтирди. Кардашьян қўл-оёқларида увишиш, бош оғриғи ва умумий ҳолсизликни ҳис қилаётганини айтиб ўтди.
Брюс Уиллис
2022 йил март ойида Брюс Уиллиснинг оиласи актёрда афазия — гапириш, нутқни тушуниш, ўқиш ва ёзиш қобилиятига таъсир қилувчи нутқ бузилиши ташхиси қўйилганини маълум қилди. 2023 йил февралда ташхис аниқланиб, Уиллисда пешона-чакка деменцияси (ПЧД) борлиги аниқланди. Уиллиснинг оиласи ҳозирда бу касалликни даволаш усуллари йўқлигини таъкидлади, аммо яқин йиллар ичида вазият ўзгаришига умид билдирди.
Ташхис қўйилгач, Уиллис актёрлик фаолиятини якунлади. Ҳозирда у оиласининг доимий парваришида. Унинг рафиқаси Эмма Ҳеминг ва собиқ рафиқаси Деми Мур, шунингдек, беш қизи актёрни фаол қўллаб-қувватлаб, ижтимоий тармоқларда унинг аҳволи ҳақида маълумот улашмоқда.
Айни пайтда касаллик зўрайиб бормоқда: Уиллиснинг нутқи ва хотирасида жиддий бузилишлар кузатилмоқда. Шундай бўлса-да, 2025 йил январда Брюс Уиллис ташхис қўйилганидан кейин илк бор жамоатчилик олдига чиқиб, Калифорниядаги ёнғинларни ўчиришда қатнашган қутқарувчиларга миннатдорлик билдирди.
Изоҳ (0)