Aktyorning gonorari — uning daromadi bo‘lib, undan kamdan kam odam o‘z ixtiyori bilan voz kechadi. Ammo ba’zida shunday bo‘lishi ham mumkin. Misol uchun, Priyanka Chopra va Karina Kapur “Billu” filmi uchun bir tiyin ham olmagan, Bryus Uillis va Jonni Depp esa gonorarlarini xayriya ishlariga bergan.
Rebekka Xoll va Timoti Shalame — “Nyu-Yorkdagi yomg‘irli kun”
“Nyu-Yorkdagi yomg‘irli kun” romantik komediyasi tanqidchilardan asosan ijobiy baho olgan. Aktyorlar shunchaki ajoyib edi: Timoti Shalame, El Fenning, Jud Lou, Rebekka Xoll va qo‘shiqchi Selena Gomes. E’tiborli jihati, Rebekka va Timoti ushbu filmdagi gonorarlaridan voz kechib, pullarni xayriya ishlariga bergan.
Bred Pitt — “Dedpul-2”
“Dedpul-2”dagi rolini Bred Pitt bir chashka qahva uchun o‘ynagan. Ammo aktyor shart qo‘ygan: Rayan Reynolds unga ichimlik olib kelsagina, u rozi bo‘ladi. Keyinchalik Reynolds tan olganidek, bunday shart Pittning tekinga ishlashi ham mumkinligini hammaga bildirish uchun eng zo‘r variant edi.
Alen Delon — “Yangi yilingiz bilan, onalar!”
Alen Delon jahon kinosining taniqli yulduzi. O‘tgan yili aktyor 86 yoshga to‘ldi, ammo so‘nggi yillarda rol o‘ynamay qo‘ydi. 2012-yilda Delon to‘satdan “Yangi yilingiz bilan, onalar!” komediyasida paydo bo‘ldi. Ma’lum bo‘lishicha, u filmdagi roli uchun bir tiyin ham olmagan. Aktyor onaga muhabbat eng kuchli tuyg‘u ekanini, bu haqdagi film uchun pul olish noo‘rin bo‘lishini aytgan.
Jonni Depp, Jud Lou, Kolin Farrell — “Doktor Parnas xayoloti”
“Doktor Parnas xayoloti” filmi tomoshabinlar xotirasida fojia sifatida esda qolgan: bosh rol ijrochisi Xit Lejer suratga olish vaqtida olamdan o‘tgan. Aktyor bosh rolni o‘ynardi, shuning uchun film taqdiri shubha ostida qolgandi.
Ammo rejissor suratga olishni davom ettirishga qaror qiladi va bir vaqtning o‘zida bir nechta Gollivud yulduzlari — Jonni Depp, Jud Lou, Kolin Farrellni taklif qiladi. Uchalasi ham filmda nafaqat rol o‘ynagan, balki gonorardan ham voz kechgan: pul Xit Lejer qizining hisob raqamiga o‘tkazilgan.
Priyanka Chopra va Karina Kapur — “Billu”
Priyanka Chopra — eng ko‘p maosh oladigan mashhur yulduzlardan biri. U Bollivud yulduzi va “Dunyo go‘zali—2000” tanlovi g‘olibi. 2009-yilda aktrisa “Billu” filmida tekinga rol o‘ynaydi. Karina Kapur ham shunday qiladi. Ikkala aktrisa ham ish haqidan voz kechib, yuborilgan cheklarni qaytarib berishgan.
Bryus Uillis — “To‘rt xona”
“To‘rt xona” — 1990-yillarning komedik filmi. Ushbu filmning aktyorlar jamoasiga faqat havas qilish mumkin: Tim Rot, Antonio Banderas, Valeriya Golino, Madonna va Bryus Uillis. Qizig‘i, Bryus filmda tekinga o‘ynashni xohlaydi va shunday qiladi ham. Ammo uning nomi titrlarga kiritilmaydi, chunki aktyor bu harakati bilan o‘zi a’zo bo‘lgan Amerika kinoaktyorlari gildiyasining qoidalaridan birini buzgan. Qoidaga ko‘ra, filmdagi barcha rollarga gonorar to‘lanishi kerak.
Mavzuga doir:
- Birgina omadsiz roli tufayli tomoshabinlar nazaridan qolgan Gollivud aktyorlari (foto)
- Filmdagi bir xil obrazni mahorat bilan gavdalantirgan, biroq rol uchun turlicha gonorar olgan aktyorlar (foto)
- 2021-yilda eng ko‘p pul ishlab topgan jahon kinosi yulduzlari (foto)
- Ularning kunlik gonorarini boshqalar bir oyda topadi: O‘zbek kinosining “eng qimmat” aktrisalari reytingi (foto)
Izoh (0)