Suriya Ichki ishlar vazirligi davlat to‘ntarishiga urinishning oldini olinganini ma’lum qildi. Bu haqda vazirlik rahbari Anas Xattobga tayanib, SANA xabar berdi.
Xattob davlat to‘ntarishiga urinish aynan qachon to‘xtatilganiga aniqlik kiritmagan. Biroq avvalgi hokimiyat faoliyatiga aloqador jinoyatchilarni ta’qib qilish bilan shug‘ullanadigan boshqarma tuzilishini aytgan.
Biz ag‘darilgan rejim (Bashar Asad hukumati) ofitserlari tayyorlagan davlat to‘ntarishi rejasini yo‘q qildik. Bu qurolli kuchlarimiz va xalqimizning sa’y-harakatlari tufayli amalga oshdi, dedi ichki ishlar vaziri.
Suriya Mudofaa vazirligi mart oyida sobiq prezident Bashar Asad tarafdorlari tomonidan yuzaga kelishi mumkin bo‘lgan xavfni bartaraf etish rejasi ishlab chiqilganini ma’lum qilgandi.
Asad tarafdorlari va Suriya kuchlari o‘rtasidagi to‘qnashuvlar
Mart oyida Latakiya, Tartus, Xama va Xoms viloyatlarida Asad tarafdorlari bo‘lgan alaviylar va yangi Suriya hukumati o‘rtasida qurolli to‘qnashuvlar bo‘lib o‘tdi. Qurbonlarning umumiy soni 1,3 ming kishidan oshdi, ulardan mingdan ortig‘i tinch aholi.
Xavfsizlik kuchlarining reydlari 10-mart kuni yakunlandi. Suriya Mudofaa vazirligi vakili Hasan Abdul G‘ani hukumat xavfsizlik kuchlari “tashqaridan ag‘darilgan Bashar Asad rejimi qoldiqlarini zararsizlantirishga” va vaziyatni barqarorlashtirishga muvaffaq bo‘lganini aytdi.
Shundan so‘ng Suriyaning yangi hukumati Rossiya hukumatiga Asadni ekstraditsiya qilish talabi bilan murojaat qildi. Al Arabiya va Al Hadath nashrlari ma’lumotlariga ko‘ra, prezident Ahmad ash-Shara’a Asadni sud qilish uchun uni ushlab berishni talab qilmoqda. Shu bilan birga, Rossiya hozircha talabni qondirishdan bosh tortmoqda, chunki buni “ikki davlat o‘rtasidagi munosabatlarni tiklash uchun yengib bo‘lmas to‘siq emas”, deb hisoblaydi.
Izoh (0)