Turkiya qurolli kuchlari Suriyada Kurdiston ishchi partiyasi (KIP) jangarilariga qarshi ehtimoliy operatsiya tufayli jangovar holatga keltirildi. Bu haqda Turkiye xabar berdi.
Suriyaning yangi rahbariyatidan terrorchi tashkilotga qarshi zarur choralar ko‘rishni talab qilgan Anqara har qanday ssenariylarga tayyorgarlikni davom ettirmoqda. Chegaradagi qo‘shinlar ehtimoliy operatsiya uchun jangovar shay holatga keltirildi, deyiladi xabarda.
Ta’kidlanishicha, Anqara ham Suriyada, ham Iroqda Kurdiston ishchi partiyasini yo‘q qilish ustida faol ishlamoqda. Bashar Asad rejimi ag‘darilgandan so‘ng, Turkiya Suriyani turli sohalarda — infratuzilmani tiklashdan tortib sog‘liqni saqlashgacha qo‘llab-quvvatlashga tayyorligini bildirdi. Ayni paytda jangarilarni yo‘q qilish choralari ko‘rilmoqda.
Shuningdek, Turkiya Suriyaning o‘tish hukumati rahbari Ahmad al-Sharaa (al-Juloniy) bilan bir nechta uchrashuvlar o‘tkazdi va talablarini bildirdi:
- Suriya fuqarosi bo‘lmagan terrorchilar, jumladan, Turkiya, Eron, Iroq va Yevropadan kelgan terrorchilar mamlakatni tark etishi kerak
- KIPning barcha rahbarlari, shu jumladan suriyaliklar ham Suriyani tark etishi lozim. Guruhning suriyalik a’zolari qurollarini tashlashi shart, ularning keyingi taqdiri Suriya hukumati tomonidan hal qilinadi.
Turkiya tashqi ishlar vaziri Xoqon Fidan esa Suriyadagi KIP jangarilariga ultimatum qo‘yilganini aytdi.
Biz hamma narsani tinch yo‘l bilan hal qilishni xohlardik, lekin agar bu amalga oshmasa, harbiy operatsiya bo‘ladi, dedi u.
Suriyada Asad rejimi qulashi
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
iyosatchi mamlakatni tark etganidan keyin isyonchilar Asad qarorgohiga bostirib kirdi, odamlar buyumlarni talon-toroj qildi. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlandi.
Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan murojaatida bu lavozimni kamida 2025-yil 1-martgacha egallab turishini aytdi.
Izoh (0)