“Hayat Tahrir ash-Shom” guruhi yetakchisi Ahmad al-Shara’a (Abu Muhammad al-Juloniy) Suriyaning o‘tish davri prezidenti deb e’lon qilindi. Bu haqda isyonchilar koalitsiyasi qo‘mondoni Hasan Abdul G‘ani ma’lum qildi.
Al-Shara’a mamlakatning yangi konstitutsiyasi qabul qilingunga qadar amal qiladigan vaqtinchalik qonunchilik kengashini shakllantirish bilan shug‘ullanadi. Suriyaning yangi hukumati armiya va xavfsizlik xizmatlarini tarqatib yubordi. Ularning o‘rniga fuqarolar xavfsizligini ta’minlaydigan yangi tuzilma paydo bo‘ladi.
Shuningdek, 1963-yilda Suriyada hokimiyatga kelgan Arab sotsialistik uyg‘onish partiyasi (BAAS) tarqatib yuborilgani e’lon qilindi. 2000-yildan buyon uning bosh kotibi sobiq prezident Bashar Asad edi.
Asad rejimi qulashi
Noyabr oyi oxirida qurolli isyonchilar, asosan HTSH jangchilari Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinlagandi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini aytgan. Endilikda al-Juloniy Suriya prezidenti deb e’lon qilindi.
Suriyaning yangi hukumati Rossiyaga talab qo‘ydi
Rossiya delegatsiyasi 28-yanvar kuni Suriyaga tashrif buyurdi. Bu Bashar Asad rejimi qulaganidan keyingi ilk uchrashuv hisoblanadi. Delegatsiya tarkibiga tashqi ishlar vaziri o‘rinbosari Mixail Bogdanov va prezidentning Suriya bo‘yicha maxsus vakili Aleksandr Lavrentyev kirgan. Uchrashuv davomida tomonlar Suriyadagi Rossiya harbiy bazalariga nisbatan hozircha hech narsa o‘zgarmagan, degan xulosaga kelgan.
Manbalarga ko‘ra, Suriyaning yangi hukumati Rossiyaga ishonchni tiklash uchun undan kompensatsiya, rekonstruksiya va qayta tiklash kabi aniq chora-tadbirlar talab qilgan. Shuningdek, Rossiyadan mamlakat sobiq prezidenti Bashar Asadni mamlakatga qaytarish so‘ralgan.
Kreml kompensatsiya talablari haqidagi xabarlarga izoh bermagan.
“Men buni hech qanday izohsiz qoldiraman. Biz Suriya hukumati bilan muloqotni davom ettiramiz”, dedi Rossiya prezidenti matbuot kotibi Dmitriy Peskov. Uning so‘zlariga ko‘ra, bu “muhim aloqalar” hisoblanadi.
Izoh (0)