Сурия Ички ишлар вазирлиги давлат тўнтаришига уринишнинг олдини олинганини маълум қилди. Бу ҳақда вазирлик раҳбари Анас Хаттобга таяниб, SANA хабар берди.
Хаттоб давлат тўнтаришига уриниш айнан қачон тўхтатилганига аниқлик киритмаган. Бироқ аввалги ҳокимият фаолиятига алоқадор жиноятчиларни таъқиб қилиш билан шуғулланадиган бошқарма тузилишини айтган.
Биз ағдарилган режим (Башар Асад ҳукумати) офицерлари тайёрлаган давлат тўнтариши режасини йўқ қилдик. Бу қуролли кучларимиз ва халқимизнинг саъй-ҳаракатлари туфайли амалга ошди, деди ички ишлар вазири.
Сурия Мудофаа вазирлиги март ойида собиқ президент Башар Асад тарафдорлари томонидан юзага келиши мумкин бўлган хавфни бартараф этиш режаси ишлаб чиқилганини маълум қилганди.
Асад тарафдорлари ва Сурия кучлари ўртасидаги тўқнашувлар
Март ойида Латакия, Тартус, Хама ва Хомс вилоятларида Асад тарафдорлари бўлган алавийлар ва янги Сурия ҳукумати ўртасида қуролли тўқнашувлар бўлиб ўтди. Қурбонларнинг умумий сони 1,3 минг кишидан ошди, улардан мингдан ортиғи тинч аҳоли.
Хавфсизлик кучларининг рейдлари 10 март куни якунланди. Сурия Мудофаа вазирлиги вакили Ҳасан Абдул Ғани ҳукумат хавфсизлик кучлари “ташқаридан ағдарилган Башар Асад режими қолдиқларини зарарсизлантиришга” ва вазиятни барқарорлаштиришга муваффақ бўлганини айтди.
Шундан сўнг Суриянинг янги ҳукумати Россия ҳукуматига Асадни экстрадиция қилиш талаби билан мурожаат қилди. Al Arabiya ва Al Hadath нашрлари маълумотларига кўра, президент Аҳмад аш-Шараъа Асадни суд қилиш учун уни ушлаб беришни талаб қилмоқда. Шу билан бирга, Россия ҳозирча талабни қондиришдан бош тортмоқда, чунки буни “икки давлат ўртасидаги муносабатларни тиклаш учун енгиб бўлмас тўсиқ эмас”, деб ҳисоблайди.
Изоҳ (0)