Middle East Eye nashrining xabar berishicha, Turkiya Suriyaning markaziy qismida joylashgan Tiyas (T4) harbiy-havo bazasini nazoratga olishga harakat qilmoqda. Anqara bu yerda havo mudofaa tizimlarini joylashtirishni reja qilgan.
Nashrga ko‘ra, Turkiya va Suriya rasmiylari o‘tgan yil dekabrdan buyon mudofaa shartnomasi bo‘yicha muzokaralar olib bormoqda. Mazkur kelishuvga binoan turklar mamlakatga harbiy yordam ko‘rsatishi, Suriya osmonini muhofaza qilishi ko‘zda tutilgan.
Nashrning o‘z manbalariga tayanib yozishicha, Anqara mazkur bazaga mahalliy ishlab chiqarilgan Hisar havo mudofaa tizimini joylashtirish orqali o‘z qo‘shinlari xavfsizligini ta’minlamoqchi. Keyinchalik u yerga kuzatuv va jangovar dronlar ham olib kelinishi mumkin.
Bundan tashqari, Turkiya hududda ko‘p halqali havo mudofaa tizimini joriy qilish orqali turli tahdidlarga, jumladan jangovar samolyotlar, dronlar va raketalarga qarshi kurash imkoniyatiga ega bo‘lmoqchi. Bu esa tabiiyki Isroilni tashvishga solyapti.
Yahudiy davlati Asad rejimi qulaganidan buyon Suriyaning qator harbiy obyektlariga, jumladan T4 bazasiga bir necha bor havo hujumlari uyushtirdi. Isroil rasmiylari Turkiyaning harbiy hozirligini xavf sifatida baholab, uni yaroqsiz holatga keltirmoqchi.
“Turkiyaning Suriyada harbiy baza ochishi bizning harakat erkinligimizga tahdid soladi”, degan Isroil xavfsizlik xizmati vakili.
Anqara, shuningdek T4 yoki Palmira bazalariga Rossiyadan sotib olingan S-400 havo mudofaa tizimlarini vaqtincha joylashtirish rejasini ham ko‘rib chiqmoqda. Biroq nashrning yozishicha, bu borada yakuniy qaror hali qabul qilinmagan. Qolaversa, Turkiyaning mazkur tizimlar bilan ba’zi muammolari bor.
AQSH bilan muzokaralar
Rossiyadan sotib olingan S-400 tizimlari sabab AQSH sanksiyalariga tushgan Anqara Vashington bilan cheklovlarni olib tashlash bo‘yicha muzokara olib bormoqda. Turklar F-35 beshinchi avlod qiruvchisi dasturiga qaytish niyatida. Ammo buning uchun ular oldiga rus qurollaridan voz kechish talabi qo‘yilyapti.
Biroq Qo‘shma Shtatlardan har doim o‘z qo‘shnilariga nisbatan bir pog‘ona yuqoriroq harbiy texnologiyalarni olib kelgan Isroil bu rejaga qarshi chiqmoqda. Tel-Aviv, Anqara F-35 samolyotlariga ega bo‘lsa, mintaqada kuchlar muvozanati buzilishi mumkinligini ta’kidlayapti.
Izoh (0)