Suriyada Bashar Asad rejimi ag‘darilganidan keyin 100 dan ortiq kimyoviy qurol saqlash obyektlari qolmoqda. Bu haqda Kimyoviy qurollarni taqiqlash bo‘yicha xalqaro tashkilot ma’lumotlariga tayanib, The New York Times xabar berdi.
Ma’lumotlar tashqi tadqiqotchilar, notijorat guruhlar va a’zo davlatlar tomonidan taqdim etilgan razvedka ma’lumotlariga asoslanadi. Asad o‘n yildan ortiq davom etgan fuqarolar urushi davomida isyonchilar va Suriya tinch aholisiga qarshi zarin, xlor va ipritli qurollardan foydalangan.
Zarin asab tizimini shikastlovchi modda bo‘lib, bir necha daqiqada o‘limga olib kelishi mumkin. Birinchi jahon urushida mashhur bo‘lgan xlor va iprit gazlari ko‘z hamda terini kuydiradi, o‘pkani suyuqlik bilan to‘ldirib, odamlarni quruqlikda bo‘la turib cho‘kayotgandek holatga soladi.
Urushning dastlabki yillarida hukumat kimyoviy qurol ishlab chiqarish va saqlash bo‘yicha 27 ta obyekt mavjudligini tan olgan. Ushbu obyektlar ekspertlar tomonidan tekshirilgan va ularni yopishga buyruq berilgan.
Biroq Asad rejimi kamida 2018-yilgacha kimyoviy quroldan foydalanishda davom etgan. Bundan tashqari, uning hukumati asosiy kimyoviy prekursorlarni import qilgan.
Ba’zi kimyoviy qurol omborlari g‘orlarda yoki sun’iy yo‘ldosh tasvirlari yordamida topish qiyin bo‘lgan boshqa joylarda yashiringan bo‘lishi mumkin. Kimyoviy qurolning yetarli darajada himoyalanmagani xavfi yuqori. Asadni qo‘llab-quvvatlovchi jangarilar ushbu kimyoviy qurolga ega bo‘lishi xavotir uyg‘otmoqda.
Suriya Mudofaa vazirligi qurollar haqidagi savollarga javob berishdan bosh tortdi va bu savollar uning vakolati doirasiga kirmasligini qisqacha ma’lum qildi.
Izoh (0)