Poyoniga yetayotgan yilda xalqaro aloqalar rivojlanib, xorijiy davlatlar bilan munosabatlari yangi bosqichga ko‘tarildi. Jumladan, O‘zbekiston va Xitoy o‘rtasidagi aloqalar 2024-yil tarixan eng yuqori darajaga ko‘tarildi. Xitoy Xalq Respublikasining favqulodda va muxtor elchisi Yuy Szyun shu mavzuda so‘z yuritdi.
“Davlatlarimiz rahbarlari yil davomida ikki bor uchrashdi. Prezident Shavkat Mirziyoyevning Xitoyga davlat tashrifi XXR–O‘zbekiston munosabatlarini yangi davrda har tomonlama strategik sheriklikning tarixiy yangi bosqichiga ko‘tardi.
Xitoy uchun O‘zbekiston bilan munosabatning bunday maqomi Markaziy Osiyo miqyosida yagona bo‘lib, xalqlarimizning o‘zaro manfaatli hamkorlikni mustahkamlashga nisbatan yuksak siyosiy ishonch darajasini to‘liq ifodalaydi”, dedi Yuy Szyun.
Joriy yil ikki davlat o‘rtasidagi tovar ayirboshlash qiymati barqaror o‘sib, 11 milliard dollardan oshdi.
“Xitoy O‘zbekistonning birinchi raqamli iqtisodiy hamkori ekanligi bizga mamnunlik baxsh etadi. Hozir mamlakatingizda 3300 dan ko‘p Xitoy korxonasi ro‘yxatga olingan. Savdo va sarmoya, yangi energiya, aloqa, infratuzilma, zamonaviy qishloq xo‘jaligi, sanoat ishlab chiqarishi kabi eng muhim sohalarda sheriklik chuqurlashmoqda.
Ko‘plab qo‘shma loyihalar izchil amalga oshirilmoqda. Xitoy—Qirg‘iziston—O‘zbekiston temiryo‘li qurilishi boshlanishi juda quvonarli voqea. Ishonchim komilki, mazkur tashabbus mintaqa davlatlari taraqqiyoti, xalqlarimiz farovonligiga xizmat qiladi”, deya ta’kidladi elchi.
O‘zbekistonga kelayotgan xitoylik sayyohlar soni sezilarli darajada ortib, yiliga 60 ming kishidan oshdi, Xitoyga O‘zbekistondan tashrif buyurganlar soni esa o‘tgan yilga nisbatan 60 foiz ko‘paydi.
“Yaqinda mamlakatlarimiz o‘rtasida o‘zaro vizasiz rejim to‘g‘risidagi shartnoma imzolandi. Mazkur bitim kuchga kirgach, fuqarolarimizning ikki davlat o‘rtasida harakatlanishi yanada qulaylashadi va jadallashadi.
Ma’lumki, boshlanayotgan 2025-yil O‘zbekistonda “Atrof-muhitni muhofaza qilish va yashil iqtisodiyot yili” deb e’lon qilindi. Biz ham doim yangi energetika, ilmiy-texnikaviy innovatsiya, raqamli iqtisodiyot, ekologiya sohalarida hamkorlik ko‘lamini kengaytirishga intilamiz. Barqaror iqtisodiy rivojlanishni rag‘batlantirish uchun yuqori va toza texnologiyalardan keng foydalanamiz”, dedi Yuy Szyun.
2025-yilda Shanxay hamkorlik tashkilotining 25-sammiti Xitoyda o‘tadi. O‘zbekiston mazkur tuzilma doirasidagi “Barqaror rivojlanish yili”ga bag‘ishlab 100 dan ziyod tadbir uyushtirishni rejalashtirgan. O‘zbekiston avvalgidek Xitoyni raislik faoliyatida qo‘llab-quvvatlashi, SHHT barqaror va sog‘lom rivojlanishiga hissa qo‘shishi kutilmoqda.
Izoh (0)