Turkiya 8-apreldan boshlab xorijga limon yetkazib berishni vaqtincha to‘xtatadi. Bu haqda Turkiya savdo vazirligi xabariga tayanib, “Ilkha” agentligi xabar bermoqda.
Qaror Turkiya Qishloq va o‘rmon xo‘jaligi vazirligi bilan birgalikda qabul qilingan. Zarurat tug‘ilganda qo‘shimcha choralar ko‘rilishi mumkin.
2025-yil 8-apreldan boshlab limon eksporti vaqtincha to‘xtatildi. Ushbu qaror butun mamlakat bo‘ylab kuzatilgan sovuq ob-havo va ichki talabni himoya qilish hamda yetkazib berish xavfsizligini ta’minlash maqsadida qabul qilindi, deyiladi xabarda.
Turkiya Savdo vazirligi ma’lumotlariga ko‘ra, so‘nggi paytlarda O‘rtayer dengizi bo‘yidagi Adana, Mersin shaharlari va Xatay viloyatlarida sovuq ob-havo kuzatilgan.
O‘zbekiston bir yilda Turkiyadan 10 ming tonnadan ortiq limon import qilgan
Statistika agentligining ma’lumotlariga ko‘ra, O‘zbekiston 2024-yilda xorijdan qiymati 3,9 million dollarga teng bo‘lgan 16,5 ming tonna limon import qilgan. Eng ko‘p limon import qilgan davlatlar esa quyidagilar:
- Turkiya — 10 024 tonna
- Xitoy — 4 106 tonna
- Tojikiston — 1 230 tonna
- Eron — 499 tonna
- Argentina — 382 tonna
- Boshqa davlatlar — 235 tonna.
Turkiyadan 2024-yilda xorijga 1 million 639 ming tonna sitrus mevalar jo‘natilgan. O‘sha yilda eksportni mamlakatlar bo‘yicha taqsimlashda birinchi o‘rinni Rossiya egallagan. Eksport hajmi 375 million dollarni tashkil etgan Keyingi o‘rinlarda 197 million dollarlik eksport hajmiga ega Iroq, 108 million dollarlik Ukraina, 49 million dollarlik Ruminiya va 48 million dollarlik Polsha joy olgan.
Izoh (0)