Qozog‘iston Jahon iqtisodiy forumining 2024-yilgi sayohat va turizmni (T&T) rivojlantirish indeksida 119 ta davlat ichida 52-o‘rinni, narx raqobatbardoshligi bo‘yicha esa 2-o‘rinni egalladi.
Narxlar raqobatbardoshligi mezoni bo‘yicha Qozog‘iston ikkinchi o‘rinni egalladi, — deya xabar beradi Qozog‘iston Turizm va sport vazirligi.
Yil davomida respublika jahon turizm reytingida 14 pog‘onaga ko‘tarilgan.
Reyting yetakchilari esa o‘zgarishsiz qolgan: AQSH birinchi, Ispaniya va Yaponiya mos ravishda ikkinchi va uchinchi o‘rinlarni egallagan. Fransiya, Avstraliya, Germaniya, Buyuk Britaniya, Xitoy, Italiya va Shveysariya kuchli o‘nlikni yakunlagan. Markaziy Osiyo davlatlari orasida Ozarbayjon (56), O‘zbekiston (78), Qirg‘iziston (102) mazkur ro‘yxatdan joy olgan .
Turizm sohasini sifat jihatidan rivojlantirishga intilishimiz reytingning turli mezonlar, jumladan, narxlar raqobatbardoshligi, xizmat ko‘rsatish sifati va ijtimoiy-iqtisodiy ta’siri bo‘yicha yaxshilanishida o‘z ifodasini topmoqda, — dedi Qozog‘iston turizm va sport vaziri Ermek Marjikpayev.
Aniqlik kiritilishicha, eng yuqori ball turizmning ijtimoiy-iqtisodiy samarasi (5), salomatlik va gigiyena (23), tabiiy (30) va madaniy resurslar (48), shuningdek, inson kapitali va mehnat bozori (43), turizm infratuzilmasi va xizmatlari (47) toifalariga berilgan.
Jahon iqtisodiy forumi sayti maʼlumotlariga ko‘ra, Qozog‘istonga 4,5 million nafar xorijiy sayyoh tashrif buyurgan. Turizmdan tushgan tushumlar 1,5 milliard dollarni tashkil etgan. 2023-yilda mamlakat milliondan ortiq xorijlikni qabul qilgan, 2022-yilda bu ko‘rsatkich 928 mingta bo‘lgan.
Aksariyat sayyohlar sayohat qilish uchun Olmaota shahrini tanlaydi. 2023-yilda shaharga ikki milliondan ortiq sayyoh tashrif buyurgan bo‘lib, shundan 540 ming nafari xorijliklardir.
2023- yili Qozog‘istonga Rossiya, Xitoy, Turkiya, Hindiston va AQSHdan sayyohlar ko‘proq tashrif buyurgan. Joriy yilda Qozog‘iston BAAdan kelgan sayyohlar uchun muqaddas Ramazon oyi va Ramazon hayiti uchun eng mashhur manzilga aylandi. 2023-yilda vizasiz rejim joriy etilganidan beri Qozog‘istonga sayohat qilayotgan xitoylik sayyohlar soni 115 foizga oshgan.
Izoh (0)