Xitoyning Xebey provinsiyasidagi qariyalar uyida yuz bergan yong‘in oqibatida 20 kishi halok bo‘ldi. Bu haqda The Guardian xabar berdi.
Yong‘in 8-aprel kuni kechasi Longhua rayonidagi qariyalar uyida yuz bergan. Bu joy Pekindan taxminan 180 kilometr shimoli-sharqda joylashgan. Qurbonlar soni 9-aprel kuniga kelib 20 kishini tashkil etgan.
Qariyalar uyidagi boshqa keksalar yaqin atrofdagi shifoxonalarga ko‘chirilgan, ularning sog‘lig‘i tekshirilmoqda va muolajalar davom etmoqda, deyiladi xabarda.
Yong‘in sabablari hozirda aniqlanmoqda. Xitoyda bunday hodisalar nisbatan ko‘p uchraydi, chunki qurilish me’yorlari sust nazorat qilinadi va ish joylarida xavfsizlik talablariga yetarlicha e’tibor berilmaydi.
Yanvar oyida Pekin shimolida joylashgan Zhangjiakou okrugidagi sabzavot bozorida yong‘in chiqqan edi. Oqibatda sakkiz kishi halok bo‘lgan, 15 kishi jarohat olgan. Mart oyida esa Xitoy sharqidagi Rongcheng shahridagi qurilish maydonchasida yuz bergan yong‘inda 9 kishi halok bo‘lgan.
Izoh (0)