AQSH prezidenti Donald Trampning o‘zi joriy etgan bojxona to‘lovlariga 90 kunlik muhlat e’lon qilmoqchi ekani haqida tarqalgan ma’lumot yolg‘on bo‘lib chiqdi. Bu haqda Oq uy matbuot xizmatiga asoslanib, CNBC xabar berdi.
Inkor etilgan ma’lumotlarga ko‘ra, Oq uy Milliy iqtisodiy kengashi direktori Kevin Xassett go‘yo muhlat Xitoydan tashqari barcha davlatlarga nisbatan qo‘llanilishi mumkinligini aytgan.
Bundan oldin Bloomberg nashriyoti Xitoyning Amerika bojxona to‘lovlariga tezkor javobi Pekinning Vashington boshlashni istagan savdo urushiga tayyorligidan darak berishini ta’kidlagan edi. O‘z navbatida, XXR Tashqi ishlar vazirligi vakili Lin Szyan Vashingtonning bojxona to‘lovlarini haqorat va qo‘rqitish sifatida baholash kerakligini aytdi.
Eslatib o‘tamiz, AQSH prezidenti Donald Tramp 2-aprel kuni 185 ta mamlakat va hududdan keltirilayotgan mahsulotlarga bojxona to‘lovlari joriy etilishini e’lon qilgandi. Xitoyga nisbatan AQSH bojlari 34 foiz darajasida belgilandi. Bunga javoban Xitoy hukumati 10-apreldan boshlab AQSHdan import qilinadigan barcha mahsulotlarga 34 foiz miqdorida qo‘shimcha bojlar joriy etilishini ma’lum qildi. Shundan so‘ng AQSH prezidenti o‘zining ijtimoiy tarmog‘ida Xitoyning AQSHga qarshi javob tariqasida boj to‘lovlari kiritishi xato qadamligini bildirib, tanqid qilgandi.
Izoh (0)