Qirg‘iziston prezidenti Sadir Japarov 24-mart kuni pasport ishlab chiqarish jarayonini va yangi “zagran” pasportlarni ko‘zdan kechirdi. Bu haqda “AKIpress” xabar berdi.
Ma’lum qilinishicha, 3 oydan so‘ng Qirg‘izistonda amaldagi xorijga chiqish pasportlari blankalarini chiqarish to‘xtatiladi. Ularning o‘rniga yangilarini chop etish boshlanadi.
Umumiy fuqarolik pasportining yangi blankalarining dizayni o‘zgartirildi. Endi unda Qirg‘iziston va uning diqqatga sazovor joylarini aks ettiruvchi qo‘shimcha tasvirlar mavjud. Jumladan, “Intimak Ordo” binosining surati ham joy olgan. Ultrabinafsha nurlarda tasvirlar o‘zgarib turadi, shuningdek, Manasning tasviri tushirilgan gologrammalar ham qo‘shilgan.
Bosmaxona direktori Qirg‘iziston pasportlarini qalbakilashtirishdan himoya qilish darajasi dunyodagi eng yaxshi o‘ntalikka kirishini aytdi. Bu esa ularning xalqaro talablarga javob berishini tasdiqlayotganini ta’kidladi.
Prezident matbuot xizmatiga ko‘ra, 2024-yil yakuniga ko‘ra Qirg‘izistonda 770 ming 103 ta pasport tayyorlangan: 359 ming 221 ta umumfuqarolik pasporti, 410 882 ta ID-karta.
Ma’lumot o‘rnida, 2025-yil yanvar oyida Qirg‘iziston dunyoning eng kuchli pasportlari reytingida 68-o‘rinni egallagan. Mamlakat fuqarolari 30 ta davlatga vizasiz tashrif buyurishi mumkin. Taqqoslash uchun, Markaziy Osiyoning boshqa davlatlarining reytingdagi o‘rni quyidagicha:
- Qozog‘iston ushbu reytingda 52-o‘rinda (46 mamlakatga vizasiz rejim);
- O‘zbekiston 68-o‘rinda (32 mamlakatga vizasiz rejim);
- Tojikiston 72-o‘rinda (27 mamlakatga vizasiz rejim);
- Turkmaniston 76-o‘rinda (18 mamlakatga vizasiz rejim).
Pasport shunchaki chegaradan o‘tish hujjati emas. U mamlakatning madaniyati, tarixi, milliy xususiyatlarini aks ettiruvchi muhim ramz hisoblanadi. Ba’zi davlatlar pasportlarini nafaqat amaliy, balki estetik jihatdan ham chiroyli qilishga harakat qiladi. Ular bu orqali o‘z milliy merosi va madaniyatini dunyoga namoyish etadi. Quyida uchta davlatning e’tiborga molik pasportlarini ko‘rib chiqamiz.
- Avtraliya
Pasport sahifalarida Avstraliyaning 17 ta asosiy diqqatga sazovor joylari tasvirlangan. Ulug‘vor Uluru qoyasidan tortib, g‘aroyib Bangl-Bangl tog‘ tizmalarigacha aks etgan. Shuningdek, mamlakatni ramziy ravishda tasvirlovchi ramzlardan kengurular bir sahifadan boshqasiga sakrab o‘tadi.
- Kanada
Kanada pasporti dunyodagi eng chiroyli pasportlardan biri hisoblanadi. Uning tashqi ko‘rinishi oddiy va kamtarona, to‘q ko‘k rangdagi muqova oltin Qirollik gerbi bilan bezatilgan. Ichki sahifalarda esa Kanada diqqatga sazovor joylari va tarixiy shaxslar tasvirlangan. Ultrabinafsha nurlarda tasvirlar yanada jonlanib, yorqin ranglarda ko‘rinadi va hajmga ega bo‘ladi. Bu nafaqat bezak, balki xavfsizlikni ta’minlovchi omil hamdir, chunki Kanada pasportini qalbakilashtirish deyarli imkonsiz.
- Xitoy
Xitoy pasporti o‘zining originalligi va go‘zalligi jihatidan boshqa davlatlar pasportlaridan qolishmaydi. Har bir sahifada diqqatga sazovor joylarning tasvirlari aks etgan. U deyarli sayyohlik qo‘llanmasiga aylangan. Pasportlarda — Shensi provinsiyasidagi Terakota armiyasi, Pekindagi “Taqiqlangan shahar”, Xaynan orolidagi kokos bog‘i, Makao shahridagi Say Van ko‘prigi va boshqa ko‘plab mashhur joylar.
Izoh (0)