“Qozog‘iston Yevropani Xitoy tovarlari bilan ta’minlamoqda” — Smailov

Xitoydan Yevropaga yuklarning qariyb 85 foizi Qozog‘iston orqali olib o‘tiladi, dedi Qozog‘iston bosh vaziri Alixon Smailov Xitoy bosh vaziri o‘rinbosari Din Syuesyan bilan uchrashuvda. Bu haqda Qozog‘iston hukumati rahbari saytidagi xabarda aytiladi.

Smailovning so‘zlariga ko‘ra, joriy yilning 10 oyi davomida mamlakatlar o‘rtasidagi tovar ayirboshlash hajmi qariyb chorakka oshgan.

Bosh vazir 10-noyabrdan kuchga kirgan vizasiz rejim Qozog‘iston — Xitoy munosabatlarida yangi sahifa ochayotganini qo‘shimcha qildi.

“Ushbu chora ishbilarmonlik aloqalarini rag‘batlantirish, savdoni soddalashtirish, o‘zaro investitsiyalarni ko‘paytirish va turizmni rivojlantirishga sezilarli ta’sir ko‘rsatadi. Bu, ayniqsa, yaqinlashib kelayotgan Xitoyda Qozog‘istonning turizm yili munosabati bilan dolzarbdir”, — dedi Smailov.

Avvalroq Smailov Qozog‘istonning Turkiston viloyatida 152 kilometr uzunlikdagi Darvoza—Maqtaorol yangi temiryo‘l liniyasi qurilishi boshlangani haqida xabar bergandi. 

Qozog‘iston prezidenti Qosim-Jo‘mart To‘qayev topshirig‘i bilan respublikaning transport-tranzit salohiyatini yanada rivojlantirishga qaratilgan yirik infratuzilma loyihasi amalga oshirilmoqda. Uning doirasida Qozog‘iston-O‘zbekiston davlat chegarasi orqali yangi nazorat-o‘tkazish punkti ochiladi.