Telegram messenjeri asoschisi Pavel Durov 2024-yilda Parijda qo‘lga olinishini Fransiya politsiyasining xatosi, deya ta’kidladi. Bu haqda u 24-avgust kuni o‘zining Telegram’dagi sahifasida ma’lum qildi.
Durovga ko‘ra, oradan bir yil o‘tib ham olib borilgan surishtiruvlar na uning, na Telegram platformasining aybdorligini isbotlay olgan.
“Istehzoli tarzda aytadigan bo‘lsam, meni Fransiya politsiyasi o‘z xatosi sabab hibsga olgan: ular 2024-yil avgust oyiga qadar Fransiya va Yevropa Ittifoqi qonunlarini inkor etib, Telegram’ga rasmiy yuridik tartib orqali so‘rov yubormagan edi. Bizning moderatsiya amaliyotlarimiz standartlarga to‘la mos keladi. Telegram Fransiyadan yuborilgan yuridik jihatdan asosli har qanday so‘rovga doimo javob bergan”, degan Telegram asoschisi.
Durovning fikricha, uni hibsga olishning yagona sababi Fransiyaning erkin davlat sifatidagi obro‘siga putur yetkazilganidir. U, shuningdek, hibsga olinganiga bir yil bo‘lgan bo‘lsa-da, hozirgacha apellyatsiya sudi sanasi belgilanmaganini, o‘zi esa har 14 kunda Fransiyaga qaytishga majbur bo‘layotganini ma’lum qilgan.
“Biz kurashni davom ettiramiz va g‘alaba qozonamiz”, deb o‘z postini yakunlagan Durov.
Ma’lumot o‘rnida, Pavel Durov 2024-yil 24-avgust kuni Parijdagi Le Bourget aeroportida bir qator ayblovlar, jumladan, ijtimoiy tarmoqda noqonuniy operatsiyalarni amalga oshirishda ishtirok etganlikda ayblanib, qo‘lga olingan edi.
Parij prokuraturasiga ko‘ra, bunday jinoyat uchun 10 yilgacha ozodlikdan mahrum etish va 500 ming yevrogacha jarima jazosi qo‘llanishi mumkin. Sudya qaroriga asosan, Durov sud nazoratiga olingan va unga 5 million yevro garov to‘lash majburiyati yuklatilgan.
Shuningdek, Durov haftasiga ikki marta politsiyaga borib bayonot berishi va Fransiyani tark etmasligi shart qilingan edi. Lekin fransuz hukumati 2025-yilning iyun oyi o‘rtalarida Durovga nisbatan nazoratni yumshatib, unga 10-iyuldan boshlab mamlakatdan chiqib ketishga ruxsat bergan.
Izoh (0)