AQSHning Davlat boshqaruvi samaradorligi departamenti (DOGE) rahbari, milliarder Ilon Mask amerikaliklar orasida 20 million nafardan ortiq “vampirlar” borligini aniqladi.
U o‘zining X ijtimoiy tarmog‘idagi sahifasida AQSHda nafaqa oladigan amerikaliklarning yoshi haqidagi jadvalni e’lon qilib, jamoatchilik e’tiborini “g‘ayrioddiy raqamlar”ga qaratdi.
Ushbu yozuvlarga izoh berar ekan, Ilon Mask yozuvchi Stefani Mayerning vampirlar haqidagi mashhur “Zulmat ostonasidagi muhabbat” romanini tilga olib, “amerikaliklar orasida haqiqatan ham vampirlar bor” deya hazillashdi.
Ijtimoiy ta’minot ma’lumotlar bazasiga ko‘ra, bu — o‘lim ustunida chiziqcha ko‘rsatilgan har bir yosh guruhidagi odamlar soni. Ehtimol, “Zulmat ostonasidagi muhabbat” romani haqiqatga to‘g‘ri keladi va ijtimoiy ta’minot oladigan ko‘plab vampirlar mavjuddir, deb yozdi Mask o‘zining ijtimoiy tarmog‘ida ma’lumotlar jadvalining skrinshotini ilova qilib.
Jadvaldan ko‘rinib turibdiki, AQSHda 20 million nafardan ortiq odam uzoq umr ko‘ruvchilar bo‘lib, ularning yoshi 100 dan oshgan.
Masalan, AQSH hududida 150-159 yoshdagilar soni 1,3 milliondan ortiqni, 220-229 yoshdagilar esa mingdan ortiqni tashkil etadi. Shuningdek, jadvalda ikki kishi — birining yoshi 240 dan 249 gacha, ikkinchisining yoshi esa 360 dan 369 gacha ekani qayd etilgan.
Ma’lumotlarga aynan qaysi bosqichda xatolik kirib qolgani hozircha noma’lum. DOGE jadvalda keltirilgan ma’lumotlarni tekshirib chiqishini ma’lum qildi.
Izoh (0)