Илон Маск Х ижтимоий тармоғини ўзининг хAI стартапига сотди. 45 миллиард долларлик битим таркибига 12 миллиард долларлик қарз ҳам киритилган бўлиб, бундан мақсад платформани сунъий идрок технологиялари билан чуқур интеграция қилишдир. Бу ҳақда Илон Маскка таяниб CNN хабар бермоқда.
Америкалик миллиардернинг сўзларига кўра, мазкур келишув ортидан Х’нинг баҳоси 33 миллиард долларга етади.
хAI ва Х’нинг келажаги бир-бирига боғлиқ, деб ёзди Маск 28 март куни ўзининг Х’даги саҳифасида.
Маскнинг таъкидлашича, бирлашув хAI’нинг илғор сунъий интеллект қобилиятлари ва тажрибасини Хънинг кенг аудиторияси билан уйғунлаштириб, “улкан имкониятлар эшигини очади”.
Х фойдаланувчилари учун нима ўзгаради?
Маск ҳозирча Х тармоғига ҳеч қандай фавқулодда ўзгаришлар киритилмаслигини айтди. Шунга қарамай, хAI томонидан яратилган сунъий интеллектли чатбот Grok аллақачон ижтимоий тармоққа интеграция қилинган. Тадбиркорнинг қўшимча қилишича, бирлашган компанияларнинг умумий қиймати 80 миллиард долларни ташкил этади.
Маскнинг сунъий идрок соҳасидаги амбициялари
Илон Маск сунъий идрок соҳасида етакчи бўлишга интилмоқда. Тадбиркор дастлабки қадамни 2024 йил бошида ташлаб, OpenAI компаниясини қарийб 100 миллиард долларга сотиб олишга ҳаракат қилган эди. Бироқ компания директорлар кенгаши Маскнинг 97,4 миллиард долларлик таклифини рад этди.
Шундан сўнг Маск дунёнинг энг илғор сунъий интеллект моделлари қаторидан ўрин олган Grok 3 чатботини тақдим этди. У Х фойдаланувчилари учун очиқ бўлиб, ижтимоий тармоқ билан интеграция қилинган.
Изоҳ (0)