Yevropa ittifoqi tomonidan taxminan 90 million yevro miqdorida qo‘llab-quvvatlanayotgan Transkaspiy xalqaro transport yo‘lagi (TXHT) Markaziy Osiyoda mintaqaviy o‘zaro bog‘liqlikni ta’minlashda katta ahamiyat kasb etadi. Bu haqda Yevropa ittifoqining tashqi ishlar bo‘yicha oliy vakili Kaya Kallas xorijiy ommaviy axborot vositalariga bergan intervyusida ma’lum qildi.
Uning aytishicha, bugungi kunda Markaziy Osiyo nafaqat o‘z resurslari va mintaqaviy barqarorlik uchun geografik ahamiyati, balki investitsion salohiyati nuqtayi nazaridan ham g‘oyat muhim hisoblanadi.
“Aynan shu sababli Yevropa ittifoqi Markaziy Osiyoda rivojlanish uchun yordam ko‘rsatishda yetakchi o‘rinni egallaydi. Biz Transkaspiy transport yo‘lagini qo‘llab-quvvatlashdan tortib, mintaqada raqamli texnologiyalarni rivojlantirishga sarmoya kiritishgacha, har ikki tomon uchun ko‘plab imkoniyatlarni ko‘rmoqdamiz”.
Kallasning ta’kidlashicha, Rossiyaning Ukraina bilan mojarosi boshlanganidan so‘ng, ular Yevropa va Osiyo o‘rtasida Rossiya hududidan o‘tmaydigan muqobil, ishonchli va samarali savdo hamda transport yo‘nalishlarini izlashga majbur bo‘lgan.
“O‘tgan yili Yevropa ittifoqi mintaqadagi ustuvor transport loyihalarini amalga oshirish jarayonini muhokama qilish uchun hukumatlar, homiylar va taraqqiyot banklari vakillarini birlashtirgan maxsus platformani ishga tushirdi. Misol uchun, Oqtav va Turkmanboshi portlarini modernizatsiya qilish loyihalari”, - deya qo‘shimcha qildi u.
Ma’lumot uchun, O‘rta yo‘lak Xitoy, Qozog‘iston, Kaspiy dengizi, Ozarbayjon, Gruziya, Turkiya va Yevropani bog‘laydi. 2023-yil oktyabr oyida Ozarbayjon, Gruziya va Qozog‘iston tranzit tashishlar samaradorligini oshirish maqsadida Middle Corridor Multimodal Ltd. qo‘shma temir yo‘l kompaniyasini tashkil etish to‘g‘risida kelishuv imzoladi.
2024-yilda TXHT orqali yuk tashish hajmi 2023-yilga nisbatan 62 foizga oshib, 4,5 million tonnani tashkil etgan. Ko‘rilayotgan chora-tadbirlar natijasida 2027-yilga kelib O‘rta yo‘lakning o‘tkazuvchanlik qobiliyati 10 million tonnagacha yetishi kutilmoqda.
Izoh (0)