Yevropa urush ehtimoliga oziq-ovqat g‘amlashga chaqirdi

Yevrokomissiya aholini turli inqirozli ssenariylarga, jumladan, harbiy mojaroga tayyorlanishni tavsiya qildi. Bu haqda CNN xabar berdi.

Tegishli hujjatga ko‘ra, suv, dori-darmon, o‘t oldirgich (“zajikgalka”), gugurt, fonar, quvvatlagichlar, issiq kiyim-kechak va sifati tez buzilmaydigan oziq-ovqat mahsulotlarini o‘z ichiga olgan minimal zaxirani yaratishga alohida e’tibor qaratish kerak. Ushbu to‘plam inson kamida 72 soat davomida o‘zgalarning yordamisiz omon qolishini ta’minlashi kerak.

Strategiya favqulodda vaziyatlarga tayyorgarlik bo‘yicha 30 ta aniq chorani o‘z ichiga oladi. 17 sahifalik loyihaga ko‘ra, bu choralarning to‘liq bajarilishi Yevropa ittifoqiga (YI) turli tahdidlarni samarali boshqarishga imkon beradi.

Ta’kidlanishicha, Yevropa COVID-19 pandemiyasi va Rossiyaning Ukrainaga hujumidan keyin doimiy tayyorgarlik holatida qolmoqda, bundan tashqari, tabiiy ofatlar va moliyaviy inqirozlar xavfi saqlanib qolmoqda. Gumanitar yordam va inqirozlarni boshqarish bo‘yicha komissar Xadja Laxbib tahdidlar tobora ortayotganini aytdi.

Strategiyada kasalxonalar, maktablar, transport va aloqa tizimlarining og‘ir sharoitlarda ishlashini ta’minlash uchun minimal tayyorgarlik standartlari belgilangan.

Shuningdek, YI inqirozlarni boshqarish uchun maxsus koordinatsiya markazi yaratishni rejalashtirmoqda. U davlatlar o‘rtasidagi hamkorlikni yaxshilaydi va YIning favqulodda vaziyatlarga javob beruvchi bosh markazi bo‘lib xizmat qiladi.

Bundan tashqari, ittifoq muhim resurslar — dori-darmonlar, xomashyo va energiya uskunalarining zaxiralarini ko‘paytirishni ham rejalashtirmoqda.

Strategiyaning maqsadi — YIga a’zo 27 davlatda favqulodda vaziyatlarga tayyorgarlik darajasini tenglashtirish. Chunki hozircha bu borada katta tafovutlar mavjud. Masalan, Ispaniya 2024-yilgi suv toshqinlaridan so‘ng tabiiy ofatlarga qarshi choralarni kuchaytirgan, Boltiqbo‘yi davlatlari esa kiberxavfsizlik tizimini mustahkamlash ustida ishlamoqda.

Hujjat turli “zaif nuqtalarni” bartaraf etishga qaratilgan bo‘lib, YI bo‘ylab yagona standartlar va umumiy zaxiralarni yaratishni ko‘zda tutadi. Garchi strategiyada yangi mudofaa tashabbuslari bo‘lmasa-da, u Shimoliy Yevropa tajribasidan olingan inqirozlarni boshqarish modelini taklif qiladi. Bu yondashuvda jamiyatning barcha qatlamlari — fuqarolar, biznes, harbiylar va hukumatlar ishtirok etadi.