O‘zbekiston, Qozog‘iston va yana beshta davlat kompaniyalari Yevropa ittifoqi (YI) sanksiyalari ostida qoldi. Ular Rossiya armiyasi uchun ikki maqsadli mahsulotlar yetkazib berishda ayblandi. Bu haqda Yevropa kengashi saytida xabar berildi.
Yevropa ittifoqi Rossiyaga qarshi sanksiyalarning 16-paketini ma’qulladi. Savdo cheklovlarini buzganlar ro‘yxatiga 53 ta firma qo‘shildi. Ularning uchdan bir qismi Rossiyada ro‘yxatga olingan. Qolganlari esa Xitoy (Gonkongni o‘z ichiga olgan holda), Hindiston, Qozog‘iston, Singapur, Turkiya, Birlashgan Arab Amirliklari va O‘zbekistonda joylashgan.
Yevropa ittifoqining ta’kidlashicha, sanksiyalar ostidagi kompaniyalar Rossiyaga raketalar va zarba beruvchi dronlar ishlab chiqarish uchun komponentlar yetkazib bergan. Yevropa kengashi hozircha bu firmalarning nomini oshkor qilmagan.
Ta’kidlanishicha, Rossiya yashirin flotining 74 ta kemasiga xizmat ko‘rsatishga cheklovlar kiritilgan. Yevropa ittifoqi birinchi marta Rossiya Markaziy bankining “Moliyaviy xabarlarni uzatish tizimi” (SPFS)dan foydalanadigan Rossiyadan tashqarida tashkil etilgan kredit yoki moliya institutlari bilan operatsiyalarni taqiqlamoqda. SPFS — bu Rossiya Markaziy banki tomonidan cheklov choralari ta’sirini bartaraf etish uchun ishlab chiqilgan maxsus moliyaviy xabar almashish xizmati.
Yevropa ittifoqidagi yoki Yevropa auditoriyasiga mo‘ljallangan yana sakkizta tashviqot ommaviy axborot vositalari faoliyati to‘xtatildi. Ular “Rossiyaning Ukrainaga qarshi tajovuzini qo‘llab-quvvatlashi va oqlashi” ta’kidlandi.
Ularning Yevropa ittifoqidagi translyatsiya litsenziyalari to‘xtatiladi. Shu bilan birga, joriy etilayotgan chora-tadbirlar ushbu ommaviy axborot vositalari va ularning xodimlariga “Yevropa ittifoqida efirga uzatishdan boshqa faoliyatni amalga oshirishga, masalan, tadqiqotlar o‘tkazish va intervyu berishga” to‘sqinlik qilmaydi.
Mana uch yildirki, Rossiya Ukrainaga tinimsiz bomba yog‘dirib, o‘ziniki bo‘lmagan yerlarni tortib olishga urinmoqda. Sanksiyalarning yangi bosqichi nafaqat Rossiya soya flotini, balki xavfli neft tankerlari faoliyatini qo‘llab-quvvatlovchilarni, dronlarni boshqaradigan video o‘yin nazoratchilarini, sanksiyalarimizni chetlab o‘tadigan banklarni va yolg‘on gapiradigan tashviqot vositalarini nishonga oladi.
Bosqinchi kim ekani, bu urush uchun kim to‘lashi va javob berishi kerakligi haqida hech qanday shubha yo‘q. Har bir sanksiyalar paketi Kremlni urush olib borish uchun mablag‘dan mahrum qiladi. Rossiyaning tajovuzkorligini tugatish bo‘yicha muzokaralar olib borilayotgan bir paytda, biz Ukrainani eng kuchli pozitsiyaga qo‘yishimiz kerak. Sanksiyalar dastakni ta’minlaydi, deya cheklovlarga izoh berdi Yevroittifoq diplomatiyasi rahbari Kaya Kallas.
Izoh (0)