Yevropa ittifoqining Tashqi ishlar va xavfsizlik siyosati bo‘yicha oliy vakili, Yevropa komissiyasi vitse-prezidenti Kaya Kallas O‘zbekistonga tashrif buyuradi.
Yevroittifoqning O‘zbekistondagi delegatsiyasi ma’lum qilishicha, dastlab, u 27-mart kuni Turkmanistonga tashrif buyuradi va Ashxobodda bo‘lib o‘tadigan yigirmanchi “Markaziy Osiyo—Yevropa ittifoqi” vazirlar uchrashuviga raislik qiladi.
So‘ng Toshkentga tashrif buyurib, O‘zbekiston tashqi ishlar vaziri Baxtiyor Saidov va prezident Shavkat Mirziyoyev bilan uchrashadi.
Undan keyin Kaya Kallas Qozog‘istondagi Olmaotaga yo‘l oladi va u yerda 28-mart kuni Qozog‘iston tashqi ishlar vaziri Murat Nurtleu bilan uchrashadi. Qozog‘iston prezidenti Qosim-Jo‘mart To‘qayev bilan ikki tomonlama uchrashuvi ham rejalashtirilgan.
17-mart kuni O‘zbekistonga Yevropa ittifoqining xalqaro hamkorlik bo‘yicha komissari Yozef Sikela tashrif buyurgandi. Tashrif davomida u TIV rahbari Baxtiyor Saidov bilan uchrashdi. Unda O‘zbekiston va Yevropa ittifoqi munosabatlarini yanada mustahkamlash yo‘llarini o‘rganib chiqib, iqtisodiy hamkorlik, sarmoyaviy va mintaqaviy barqarorlikka katta e’tibor qaratildi.
18-mart kuni Sikela Shavkat Mirziyoyev qabulida bo‘ldi. O‘zbekiston bilan Yevropa ittifoqi o‘rtasidagi ko‘p qirrali munosabatlarni yanada rivojlantirishning dolzarb masalalari muhokama qilindi. Uchrashuvda joriy yil aprel oyi boshida Samarqand shahrida “Markaziy Osiyo—Yevropa ittifoqi” birinchi sammiti va Iqlim forumini tashkil etish va o‘tkazish jihatlari ham ko‘rib chiqildi.
Tashrif davomida O‘zbekiston Yevropa ittifoqi tomonidan moliyalashtiriladigan telekommunikatsiya sohasidagi ikki strategik loyiha bo‘yicha kelishuvlarga erishdi.
“Markaziy Osiyo—Yevropa ittifoqi” sammiti haqida
Ushbu sammit 2025-yil 3—4-aprel kunlari Samarqand shahrida bo‘lib o‘tadi. Tadbirda Yevrokengash va Yevropa komissiyasi prezidentlari Antoniu Koshta va Ursula fon der Lyayen ishtirok etadi. Qozog‘iston, Qirg‘iziston, Tojikiston va Turkmaniston rahbarlari ishtirokidagi sammitga prezident Shavkat Mirziyoyev raislik qiladi.
Izoh (0)