Yevropa futbol assotsiatsiyalari ittifoqi (UEFA) 2025-yil 12-mart kuni bo‘lib o‘tgan Chempionlar Ligasi 1/8 final javob o‘yinidan so‘ng “Real Madrid” futbolchilari – Antonio Ryudiger, Kilian Mbappe, Dani Sebalyos va Vinisius Juniorning xatti-harakatlarini tekshirish uchun intizomiy komissiya tuzdi.
Ushbu bahsda “Real” “Atletiko Madrid” ustidan penaltilar seriyasida (4:2) g‘alaba qozonib, chorak finalga yo‘l olgan edi. Asosiy vaqt va qo‘shimcha bo‘limlarda Anchelotti shogirdlari 0:1 hisobida imkoniyatni boy bergan bo‘lsa-da, umumiy hisob 2:2 bo‘ldi va penaltilar seriyasida “qirollik klubi” ustun keldi.
O‘yin yakunidan keyin “Real” futbolchilari “Atletiko” muxlislariga nisbatan nomaqbul harakatlar qilgani aytilmoqda. Xususan, Antonio Ryudiger bo‘ynini kesish ishorasini ko‘rsatgan, Dani Sebalyos va Kilian Mbappe muxlislarga nisbatan haqoratli imo-ishoralar qilgan, Vinisius Junior esa klub emblemasini muxlislarga ko‘rsatib, ularni yanada g‘azablantirgan.
UEFA bu holat bo‘yicha etika va intizom inspektorini tayinladi. Tekshiruv natijasida futbolchilarga jarima yoki diskvalifikatsiya kabi sanksiyalar qo‘llanishi mumkin. Bu esa “Real Madrid”ning chorak finaldagi o‘yinlariga ta’sir qilishi ehtimoli bor. Madridliklar 8 va 16-aprel kunlari Londonning “Arsenal” jamoasiga qarshi maydonga tushishi rejalashtirilgan.
“Real Madrid” rahbariyati futbolchilarining harakatlarini oqlashga harakat qilmoqda. Klub vakillarining ta’kidlashicha, “Atletiko” muxlislari futbolchilarga nisbatan provokatsion harakatlar qilgan, hatto maydonga turli buyumlar uloqtirilgan.
Izoh (0)