Европа иттифоқи томонидан тахминан 90 миллион евро миқдорида қўллаб-қувватланаётган Транскаспий халқаро транспорт йўлаги (ТХҲТ) Марказий Осиёда минтақавий ўзаро боғлиқликни таъминлашда катта аҳамият касб этади. Бу ҳақда Европа иттифоқининг ташқи ишлар бўйича олий вакили Кая Каллас хорижий оммавий ахборот воситаларига берган интервьюсида маълум қилди.
Унинг айтишича, бугунги кунда Марказий Осиё нафақат ўз ресурслари ва минтақавий барқарорлик учун географик аҳамияти, балки инвестицион салоҳияти нуқтайи назаридан ҳам ғоят муҳим ҳисобланади.
“Айнан шу сабабли Европа иттифоқи Марказий Осиёда ривожланиш учун ёрдам кўрсатишда етакчи ўринни эгаллайди. Биз Транскаспий транспорт йўлагини қўллаб-қувватлашдан тортиб, минтақада рақамли технологияларни ривожлантиришга сармоя киритишгача, ҳар икки томон учун кўплаб имкониятларни кўрмоқдамиз”.
Калласнинг таъкидлашича, Россиянинг Украина билан можароси бошланганидан сўнг, улар Европа ва Осиё ўртасида Россия ҳудудидан ўтмайдиган муқобил, ишончли ва самарали савдо ҳамда транспорт йўналишларини излашга мажбур бўлган.
“Ўтган йили Европа иттифоқи минтақадаги устувор транспорт лойиҳаларини амалга ошириш жараёнини муҳокама қилиш учун ҳукуматлар, ҳомийлар ва тараққиёт банклари вакилларини бирлаштирган махсус платформани ишга туширди. Мисол учун, Оқтав ва Туркманбоши портларини модернизация қилиш лойиҳалари”, дея қўшимча қилди у.
Маълумот учун, Ўрта йўлак Хитой, Қозоғистон, Каспий денгизи, Озарбайжон, Грузия, Туркия ва Европани боғлайди. 2023 йил октябрь ойида Озарбайжон, Грузия ва Қозоғистон транзит ташишлар самарадорлигини ошириш мақсадида Middle Corridor Multimodal Ltd. қўшма темир йўл компаниясини ташкил этиш тўғрисида келишув имзолади.
2024 йилда ТХҲТ орқали юк ташиш ҳажми 2023 йилга нисбатан 62 фоизга ошиб, 4,5 миллион тоннани ташкил этган. Кўрилаётган чора-тадбирлар натижасида 2027 йилга келиб Ўрта йўлакнинг ўтказувчанлик қобилияти 10 миллион тоннагача етиши кутилмоқда.
Изоҳ (0)