FIFA va UEFA tomonidan Rossiya terma jamoasi va klublarining xalqaro musobaqalarda ishtirok etishiga qo‘yilgan taqiq bo‘yicha yangi tafsilotlar oshkor bo‘ldi. Bu haqida The Independent nashriga tayanib, Sport-Express xabar bermoqda.
Manbaga ko‘ra, ushbu qarorga 12 ta Yevropa futbol assotsiatsiyasining Rossiya terma jamoasiga qarshi o‘ynashdan bosh tortgani asosiy sabab bo‘lgan.
Mazkur mamlakatlardan biri Polsha bo‘lib, u JCH-2022 saralash bosqichida Rossiya bilan uchrashishi kerak edi. FIFA bunday vaziyatda rejalashtirilgan o‘yinlarni belgilangan muddatdan tashqarida o‘tkaza olmas edi. Shu sababli tashkilot Rossiyani saralash musobaqalaridan chetlatishga majbur bo‘ldi, deb xabar berildi manbada.
Avvalroq FIFA va UEFA Rossiya jamoalarini xalqaro musobaqalarga qaytarish imkoniyatini ko‘rib chiqayotgani haqida ma’lumotlar tarqalgan edi. 27-mart kuni Rossiya futbol ittifoqi (RFI) rahbari Aleksandr Dyukov ushbu masala 3-aprel kuni Belgradda bo‘lib o‘tadigan UEFA Kongressi doirasida muhokama qilinishini ma’lum qildi.
Eslatib o‘tamiz, Rossiya klublari va terma jamoalari 2022-yilning fevral oyidan buyon FIFA va UEFA homiyligidagi xalqaro musobaqalarda qatnasha olgani yo‘q.
Izoh (0)