NATO bosh kotibi Mark Ryutte Rossiya alyansning biror davlatiga hujum qilsa, “qaqshatqich javob” berilishidan ogohlantirdi. Bu haqda Associated Press xabar berdi.
Agar kimdir xatoga yo‘l qo‘yib, Polsha yoki boshqa ittifoqchilarimizdan biriga hujum jazosiz qoladi deb o‘ylasa, u ittifoqning butun qudratiga to‘qnash keladi. Bizning javobimiz qaqshatqich bo‘ladi. Bu Vladimir Putin va bizga hujum qilishga qaror qilganlarning barchasi uchun aniq bo‘lishi kerak, dedi Ryutte.
U ushbu bayonotni Varshavada Polsha bosh vaziri Donald Tusk bilan o‘tkazilgan qo‘shma matbuot anjumanida berdi. Ryutte, shuningdek, AQSHning NATO nizomining 5-moddasida belgilangan kollektiv xavfsizlik kafolatlariga sodiqligiga to‘liq ishonch bildirdi.
Hozir Yevropa uchun ham, Shimoliy Amerika uchun ham yakka tartibda harakat qilish vaqti emas. Zamonaviy global xavfsizlik muammolari juda jiddiy bo‘lib, ularni yolg‘iz hal qilib bo‘lmaydi, deya ta’kidladi u.
NATO bosh kotibi iyun oyida Niderlandiyada bo‘lib o‘tadigan alyans sammitini transatlantik ittifoq tarixida yangi bosqichning boshlanishi sifatida baholadi. U NATO murakkab geosiyosiy vaziyatda tahdidlarga samarali javob qaytarishi uchun “yanada kuchli, adolatli va halokatli” bo‘lishi zarurligini aytdi.
Shuningdek, sammitda mudofaa xarajatlari bo‘yicha yangi mezonlar belgilanadi. Hozir NATOga a’zo 23 ta davlat mudofaa byudjeti uchun yalpi ichki mahsulotning kamida 2 foizini ajratish majburiyatini bajarmoqda, biroq Ryuttening so‘zlariga ko‘ra, yangi maqsad “3 foizdan ancha yuqori” bo‘lishi mumkin.
Fevral oyida Daniya harbiy razvedkasi yaqin 5 yil ichida Yevropada “keng ko‘lamli urush” ehtimoli haqida ogohlantiruvchi hisobotni e’lon qildi. Vazirlik hisob-kitoblariga ko‘ra, agar Rossiya NATOni ham harbiy, ham siyosiy jihatdan zaif deb hisoblasa, u alyansning bir yoki bir nechta davlatiga qarshi kuch ishlatishga qaror qilishi mumkin.
Rossiyaning boshqa davlatlarga ehtimoliy hujumi: mavzuga oid yangiliklar
NATO doiralaridagi manbalarga ko‘ra, Rossiya Finlyandiya va NATOning sharqiy qanotidagi boshqa davlatlarga hujum qilish rejasini ishlab chiqqan. Gap Rossiya armiyasining bir nechta bo‘linmalarining bir vaqtning o‘zida hujumi haqida ketmoqda. Unga o‘n minglab askar jalb qilinishi ehtimoli borligi aytilgan.
Financial Times nashriga ko‘ra, Rossiya Yaponiya va Janubiy Koreya bilan ehtimoliy urush uchun nishonlarning batafsil ro‘yxatini tuzgan. Ro‘yxatga 160 ta harbiy va fuqarolik infratuzilmasi obyektlari — atom elektr stansiyalari, ko‘priklar, zavodlar va qo‘mondonlik punktlari kiritilgan. 2008–2014-yillardagi maxfiy hujjatlar X-101 raketalari bilan zarbalar berishni va Yaponiya hamda Janubiy Koreyaning havo mudofaasini tekshirishni tasvirlaydi.
Yevropa diplomatiyasi rahbari Kaya Kallas Rossiya 2028-yildayoq Yevropa ittifoqiga hujum qilishi mumkinligini aytib, Yevropani mudofaa xarajatlarini oshirishga chaqirgan. NATO bilan urush 4-6 yildan keyin bo‘lishi mumkinligi ta’kidlangan.
Izoh (0)