Ijtimoiy tarmoqlarda Toshkent—Samarqand yo‘nalishi bo‘yicha ketayotgan Sharq poyezdidan topilgan suvaraklar haqida xabarlar tarqaldi. “O‘zbekiston temir yo‘llari” mazkur xabarlarga munosabat bildirdi.
Unda taʼkidlanishicha, bu maʼlumot yolg‘on va haqiqatga to‘g‘ri kelmaydi. Xabarda ishlatilgan fotosuratlar boshqa yo‘nalish — Toshkent—Volgograd poyezdiga bag‘ishlangan eski nashrdan olingan. Ushbu suratlarning Sharq poyezdi bilan hech qanday aloqasi yo‘q.
Ulardan ushbu kontekstda foydalanish faktlarni manipulyatsiya qilishdir.
Biz yo‘lovchilarimizning qulayligi va xavfsizligi haqida qayg‘uramiz va muntazam ravishda barcha poyezdlar, jumladan, “Sharq” poyezdlarida sanitariya meʼyorlariga rioya etilishi ustidan nazoratni kuchaytirgan holda ko‘rikdan o‘tkazamiz.
Biz asosli faktlarni taqdim etishga va jamiyatni maqsadli ravishda chalg‘itmaslikka chaqiramiz, deyiladi munosabatda.
2023-yilda rossiyalik bloger Ilya Varlamov “O‘zbekiston temir yo‘llari” aksiyadorlik jamiyati xizmat ko‘rsatish sifatini tanqid qilgandi.
Blogerning ta’kidlashicha, u Samarqand—Toshkent yo‘nalishidagi poyezdning lyuks vagoniga 100 dollarga bilet xarid qilgan.
“Tezyurar poyezdda bilet qolmagani sababli oddiy poyezdning lyuks vagonidan joy oldim. Lekin O‘zbekistonda vagonlarning bir-biridan farqi yo‘q, shekilli”, deb izoh qoldirgan bloger.
Mazkur holat yuzasidan tezkor yig‘ilish o‘tkazilgan. Ko‘rsatilgan kamchiliklar yuzasidan ushbu sanada xizmat vazifasini olib borgan vagon kuzatuvchilari va poyezd boshlig‘iga qat’iy intizomiy jazo qo‘llangan, yo‘lovchi poyezdlarda servis va xizmat ko‘rsatish qoidalari haqida qayta ko‘rsatmalar berib o‘tilgan.
Izoh (0)