Pokiston armiyasi mamlakat janubi-g‘arbida yuzlab yo‘lovchilar bo‘lgan poyezdni olib qochgan jangarilarga qarshi harbiy operatsiya yakunlanganini ma’lum qildi.
Reuters bergan ma’lumotlarga ko‘ra, jami 400 dan ortiq yo‘lovchini garovda saqlagan 33 jangari yo‘q qilingan.
Qurbonlar orasida tinch aholi vakillari bilan birga harbiylar ham bor. Rasmiy manbalarga ko‘ra, operatsiya davomida 33 ga yaqin jangari va garovga olinganlarning 21 nafari hamda 4 nafar harbiy halok bo‘lgan.
11-mart kuni boshlangan mojaroda Balujiston ozodlik armiyasining (BLA) ayirmachi jangarilari Kvettadan Peshovarga ketayotgan Jaffar ekspress poyezdini egallab oldi.
Jangarilar temir yo‘lning bir qismini portlatib yuborib, ichida 400 dan ortiq yo‘lovchi, jumladan, 100 dan ortiq xavfsizlik xodimi bo‘lgan poyezdga qarata raketalar otgan. Hujum uchun javobgarlikni Balujistonga ko‘proq avtonomiya yoki mustaqillik berishni istagan BLA ayirmachi guruhi o‘z zimmasiga oldi. Ushbu guruh so‘nggi yillarda xavfsizlik kuchlari va infratuzilma obyektlariga ko‘plab hujumlar uyushtirmoqda.
Jangarilar garovga olinganlarning bir qismidan jonli qalqon sifatida foydalangan. Ularning xudkush nimchalari harbiylarni chalg‘itgan. Qiyinchiliklariga qaramay, harbiylar 300 dan ortiq yo‘lovchini qutqarishga muvaffaq bo‘ldi. BLA garovga olinganlarning talablari bajarilmasa, ularni qatl qilish bilan tahdid qilgan.
Poyezd mashinisti Amjad so‘zlariga ko‘ra, hujum boshlanganda u boshqaruv kabinasining poli ostiga yashiringan va u yerda 27 soat qolib ketgan. Jangarilar uni o‘ldiga chiqargan.
Pokiston bosh vaziri Shahboz Sharif 13-mart kuni Balujistonga tashrif buyurib, garovdan ozod etilganlar bilan uchrashdi. U hujumni “qo‘rqoqlik” deb qoralab, mintaqada xavfsizlikni kuchaytirishga vaʼda berdi. Rasmiylarning bildirishicha, halok bo‘lganlardan 25 nafarining jasadi Kvettaga olib ketilgan, u yerda oilalar motam marosimlarini o‘tkazadi.
Ushbu holat Pokiston hukumati va Balujistondagi ayirmachi guruhlar o‘rtasida davom etayotgan qarama-qarshilikni yanada murakkablashtirdi. BLA Pokiston va bir qator G‘arb davlatlari tomonidan “terrorchilik tashkiloti” deb topilgan.
Pokiston Afg‘oniston va Eron bilan chegaradosh Balujiston kabi hududda xavfsizlik bilan bog‘liq murakkab muammolarga duch kelmoqda. Xalqaro hamjamiyat bunday terrorchilik harakatlarini qoralab, mojarolarni tinch yo‘l bilan hal etish zarurligini ta’kidladi.
Izoh (0)