Pokistonning janubi-g‘arbiy Balujiston viloyatida separatist jangarilar yo‘lovchi poyezdini garovga olib, kamida 10 kishini o‘ldirdi. Hukumat va temiryo‘l rasmiylarining 11-mart kechga yaqin e’lon qilingan bayonotiga ko‘ra, qurbonlar orasida 9 nafar xavfsizlik xodimi va poyezd mashinisti bor.
Ma’lum qilinishicha, jangarilar Jaffer Express poyezdini Bolan tumanidagi tunnel ichida to‘xtatgan. Poyezd Quettadan Peshovarga yo‘l olgan bo‘lib, 9 ta vagonda taxminan 450 nafar yo‘lovchi bor edi. Hujum chog‘ida “shiddatli otishma” kuzatilgan.
Xavfsizlik kuchlari hozirgacha 155 kishini ozod qildi. Yaradorlar shifoxonaga yetkazilgan, qolganlarni qutqarish ishlari davom etmoqda.
Mazkur hujum uchun javobgarlikni “Balujiston ozodlik armiyasi” o‘z zimmasiga oldi. U Pokistondan mustaqillik ambitsiyasi bilan muntazam terrorchilik aktlari uyushtirib turishi bilan mashhurdir.
Jangarilar garovdagilarni “qirish” bilan tahdid qilgan. Biroq, shunga qaramay, Balujiston rahbari Mir Sarfraz Bugti harbiy amaliyot “oxirgi terrorchi yo‘q qilingunga qadar” davom etishini bildirdi. So‘nggi ma’lumotlarga ko‘ra, 27 nafar jangari yo‘q qilingan, yana bir qanchasi jarohatlangan.
Pokiston bosh vaziri Shahboz Sharif hujumni qoralab, uni ramazon oyida tinch aholini nishonga olgan “terroristik jinoyat” deb atadi.
Balujistonda terrorchilik harakatlari vaqti-vaqti bilan yuz berib turadi. Separatistlar, ayniqsa, Xitoy tomonidan ijaraga olingan Gvadar portini tez-tez nishonga olib keladi.
So‘nggi yillarda “Bir makon, bir yo‘l” loyihasining bir qismi hisoblangan mazkur port va uning ishchilariga qarshi ko‘plab portlashlar va xurujlar yuz berdi. Oqibatda ko‘plab xitoyliklar halok bo‘lgan.
Izoh (0)