Samarqand viloyatning Jomboy tumanidan Urgutga tomon temiryo‘l yo‘l tarmog‘i tortiladi, deb xabar bermoqda viloyat hokimligi matbuot xizmati.
Shavkat Mirziyoyev Samarqand viloyatining iqtisodiy salohiyatini yanada oshirish, “Urgut” erkin iqtisodiy zonasidagi korxonalarning eksport va import operatsiyalarini amalga oshirish imkoniyatlarini kengaytirish maqsadida Urgut tumaniga temiryo‘l tarmog‘i tortish tashabbusini ilgari surgan edi. Ana shu maqsad asosida viloyatning Jomboy tumanidan Urgutga tomon temiryo‘l qurilishi boshlandi.
Uzunligi 50 kilometrdan ortiq bo‘lgan yangi tarmoq “Toshtemiryo‘lloyiha” mas’uliyati cheklangan jamiyati tomonidan ishlab chiqilgan bosh reja bo‘yicha zamonaviy muhandislik yechimlari hisobga olingan holda barpo etiladi.
“Masad Urgut tumanining erkin iqtisodiy zonalarini rivojlantirish, kelajakda odamlarga qulaylik yaratish”, deydi “Temiryo‘l loyihasi” MCHJ direktori Rasuljon Ro‘ziyev.
Jomboy tumanidagi “MAN” zavodi yaqinidan boshlanuvchi yangi temiryo‘l tarmog‘i 4R-238 avtomobil yo‘lini kesib, Zarafshon daryosi bo‘ylab o‘tadi va so‘ngra ushbu daryo ustida barpo etiladigan ko‘prik orqali Urgut tumaniga boradi.
Temiryo‘l o‘tadigan Jomboy, Samarqand, Toyloq va Urgut tumanlarining aholi gavjum hududlarida bekatlar tashkil etiladi. Masalan, Tojikiston bilan chegaradosh Urgut tumanida joylashgan “Jartepa” chegara bojxona posti yaqinida bekat quriladi. Bu esa tojikistonliklarga O‘zbekiston bo‘ylab temiryo‘l orqali ham sayohat qilish imkonini beradi.
Temiryo‘lga tamal toshi qo‘yish tadbirida qatnashgan transpori vaziri Ilhom Mahkamov, Samarqand viloyati hokimi vazifasini bajaruvchi Adiz Boboyev va boshqa mas’ullar yangi tarmoq hududda joylashgan aholi uzog‘ini yaqin qilish bilan birgalikda ishlab chiqarilgan yuqori sifatli mahsulotlarni xorij bozoriga eksport qilish imkoniyatini ham oshirishini ta’kidladi.
Avvalroq Parkentdan Toshkent shahrigacha salkam 24 kilometr uzunlikdagi temiryo‘l barpo etilayotgani haqida xabar berilgan edi. Yangi yo‘nalishni loyihalash ishlari “Boshtransloyiha” AJ, qurilish ishlari esa temiryo‘lchi mutaxassislar tomonidan amalga oshiriladi. Tuman markazidagi ko‘prik rekonstruksiya qilinyapti.
2025-yil 20-yanvardan Amudaryo ustidan o‘tuvchi yangi ko‘prikda Urganch—Qo‘ng‘irot—Urganch yo‘nalishi bo‘yicha yangi poyezd qatnovi yo‘lga qo‘yilgandi.
Izoh (0)