“O‘ztemiryo‘lkonteyner” tomonidan Hindistondan Qozog‘istonga birinchi poyezd yo‘lga qo‘yildi, deb xabar bermoqda tashkilot axborot xizmati.
Ma‘lum qilinishicha, transport yo‘laklarini kengaytirish va xalqaro yuk tashishlarni rivojlantirish doirasida “O‘ztemiryo‘lkonteyner” AJ, “TULM” OAJ va “Kedentransservis” AJ hamkorligida Hindistondan Qozog‘istonga birinchi konteyner poyezdi yo‘lga qo‘yildi.
Tarkibida 12 ta yigirma futlik konteyner bo‘lgan poyezd Hindistonning Mundra portidan Qozog‘istonning Sorokovaya stansiyasiga Hindiston—Eron—Turkmaniston—O‘zbekiston—Qozog‘iston yo‘nalishida harakatlanib, 1 585 km dengiz orqali va 4 300 km temir yo‘l orqali bosib o‘tadi.
2024-yilda ushbu yo‘nalish bo‘ylab Hindistondan O‘zbekistonga (Mundra — Sergeli) 20 ta yigirma futlik konteyner tashuvlari muvaffaqiyatli amalga oshirilgan edi.
“O‘ztemiryo‘lkonteyner” AJ boshqaruv raisi M.K. Mirxamidovning ta‘kidlashicha, kompaniya Hindiston — Markaziy Osiyo multimodal yo‘nalishida muntazam konteyner poyezdlarini yo‘lga qo‘yishni rejalashtirgan. Bu o‘z navbatida savdo aloqalarini mustahkamlash hamda eksportyor va importyorlar uchun yangi imkoniyatlar yaratishga xizmat qiladi.
Qayd etilishicha, “O‘ztemiryo‘lkonteyner” AJ xalqaro konteyner tashuvlarini faol rivojlantirishni davom ettirib, mijozlarga yuklarni samarali va o‘z vaqtida yetkazib berish uchun yangi logistika yechimlarini taklif qilmoqda.
Bundan avval Toshkentdan First Dry Port Terminal terminali orqali konteynerli blok poyezd Braziliyaga yo‘lga chiqqani haqida xabar berilgandi. Yuk poyezdi 11-dekabr kuni jo‘nab ketgan bo‘lib, tarkibda jami 12 metrli 54 ta konteyner bor (har birida 28 tonna karbamid mavjud).
“Poyezd O‘zbekiston, Turkmaniston, Ozarbayjon va Gruziya hududlaridan o‘tadi. Poti portida (Qora dengizning sharqiy qismidagi eng yirik port) temiryo‘l platformalaridan konteynerlarni kemaga qayta yuklash va dengiz orqali Paranagua (Braziliya) portiga yetkazish rejalashtirilgan”, degan First Dry Port Terminal vakili.
Qayd etilishicha, yuklar O‘zbekiston kimyo sanoatida eksport-import operatsiyalari bo‘yicha yagona agent — “O‘zkimyoimpeks” kompaniyasi tomonidan yuborilgan.
Yuklar manzilga, taxminan, 60-70 kunda yetib boradi. O‘zbekistondan Poti portigacha konteynerlar 20 kunda, dengiz orqali esa 35-45 kunda yetkazilishi rejalashtirilgan.
Izoh (0)